Asyq oıyndary Qytaı, Gonkong, Polshada tanystyrylmaq
ASTANA. QazAqparat - «Kazakh Tourusm» ulttyq kompanııasy halyq arasynda asyq jınaý qaıyrymdylyq aktsııasyn jarııalady, dep habarlaıdy QazAqparat tilshisi.
Osylaısha, ulttyq kompanııa qazaqtyń ulttyq oıynyn álemdik kórmelerde nasıhattamaq.
«Naýryz aıynda Germanııada ótetin álemdegi eń iri týrıstik kórme - ITB Berlin kórmesinde barǵaly otyrmyz. Ondaǵy ulttyq pavılondy kıiz úı tárizdi quryp, ulttyq elementterge basymdyq beriledi. Pavılon qonaqtary qazaqtyń ulttyq aspaptaryn jasaýdy, «Qara jorǵa» bıin bıleýdi jáne kıiz úı tigýdi úırenetin bolady. Odan bólek, qonaqtarǵa asyq oınatyp, jeńimpazdarǵa asyq jıyntyqtaryn syıǵa tartamyz», - dedi «Kazakh Tourusm» UK» AQ basqarma tóraǵasy Rashıd Kúzembaev Astanada ótken baspasóz máslıhatynda.
Germanııadaǵy kórmeden keıin asyq oıyndaryn Qytaıda, Gonkongta, Ońtústik Koreıa men Polshada ótetin kórmelerde tanystyrý josparlanǵan. Ulttyq kompanııa ókilderiniń aıtýynsha, dál osy kórmelerge óte kóp asyq qajet.
Rashıd Kúzembaevtyń aıtýynsha, asyq jınaý naýqany jyl saıyn júrgizilip turady. Asyqtyń búkil álemge taralýyna úles qosqysy kelgender arnaıy ortalyqtarǵa kelip ótkize alady. Mundaı ortalyqtar Astanada jáne keıinirek ózge óńirlerde ashyla bastaıdy.
Eske sala ketsek, 2017 jyldyń jeltoqsan aıynda asyq atý qazaqtyń dástúrli oıyny retinde UNESCO-nyń Adamzattyń materıaldy emes mádenı murasy tizimine engen edi.
Asyq atý - kóshpeli halyqtardyń ejelgi oıyny. Asyq oınaý qoldyń kishi motorıkasy men mıdyń damýyna septigin tıgizedi. Kognıtıvti fýnktsııalar men logıkany jaqsartady. Asyq oıynyna áýes bala tabandy, zerek, sabyrly ári ustamdy bolyp ósedi.
