Asyq oınaıtyn orys qyzy: Kózdiń ótkirligin damytady

QARAǴANDY. QazAqparat – Bes asyq. Qazaqtyń ulttyq oıyny. Salmaq ólshemeıtin, boıǵa qaramaıtyn sport túri. Balanyń júıke júıesin shyńdap, oıda saqtaý qabiletin jetildiredi. Naǵyz mergendikke baýlyıdy. Basty salmaq saqaǵa túsedi. Toppen de jekeleı de synǵa túsýge bolady. Barlyǵy 15 kezeńnen ótýi kerek

Vıktorııa Estremskaıa ulttyq oıyndy 12 jasynan bastap janyna serik etken. Qazaqtyń tól oıynyn tórge shyǵaryp júrgen oqýshy. Áshekeı buıymdardan kóri, babynda pisken jiliktegi asyqty alýǵa asyǵady eken. Ony boıap baptaıtynyn da jasyrmaıdy.

«Basqa qyzdar oınap jatqanda qyzyǵatynmyn. Men de solaı oınasam ǵoı dep armandaıtynmyn. Bastapqyda qıyn boldy. Saýsaqtarymyzǵa qatty tıse, aýyratyn. Qazir biraq úırenip kettim. Oıyn barysynda sabyrlyq paıda bolady. Kózdiń ótkirligin damytady», - deıdi qyz bala.

Bes asyq oınynyń talaby ońaı emes deıdi Vıktorııa. Asyqtyń salmaǵy balanyń jasyna qaraı 8-den 13 grammǵa deıin bolýy tıis. Ár kezeńde erejeni de eskerý mańyzdy.

«Birinshi kezeńi birlik dep atalady. Munda saqany laqtyryp basqa asyqtardy jınaımyz. Asyqtar bir birine tımeýi kerek. Eń sońynda saqany ortaǵa qoıamyz», - deıdi Vıktorııa Estremskaıa.

Qaraǵandy oblysynda qazaqtyń ulttyq oıynyn – bes asyqty qaıta jańǵyrtqan osy Izendi aýyly. Orta mektepte qosymsha úıirme 2014 jyly ashylǵan. Qazir ár jas aralyǵyndaǵy oqýshylardan qurylǵan lıga da bar. Murat Aqzamov ulttyq oıyndy talapkerler sanasyna salmaqtap júrgen jattyqtyrýshy. Búginde shákirtteriniń jetistigi mol.

«Bes asyqty bastaǵan sebebimiz – osy asyq oıyndaǵy sporttyq oıyndar baǵdarlamasyna kiredi dep habarlandy. Sondyqtan osy oıyn túrin jan- jaqty zerttep, balalarǵa úıretýdi sheshtik», - deıdi jattyqtyrýshy Murat Aqzamov.

Bes asyq oıyny aldaǵy ýaqytta Azııa oıyndarynyń baǵdarlamasyna enedi eken. Sondyqtan bapker balalardyń qarym qabiletin odan ári shyńdaı beremiz deıdi. Sebebi qazaq balasynyń esepke júıriktigi osyndaı oıyndardy oınaýdan qalyptasqan.

Táýelsizdik alǵaly ulttyq oıyndar qaıta jańǵyryp, ult murasy tolyǵa tústi. Sonyń ishinde ásirese asyq oıyny qarqyn alyp jańasha túrlendi. Oǵan sebep – jastar arasyndaǵy qyzyǵýshylyqtyń arta túsýi.