Asyq atý týrnıri barlyq ulttyq oıyn áýesqoılary úshin merekege aınalmaq
ASTANA. 1 maýsym. QazAqparat - Astanada qala kúnine oraı, asyq atýdan «Altyn saqa» týrnıri ótedi. Bul týraly astana.kz saıty habarlaıdy.
«Astananyń týǵan kúni jyl saıyn án aıtylyp, bı bılenip, túrli oıyndarmen atap ótiledi. Qalanyń árbir turǵyny ózine qyzyqty is-sharany tańdaıdy. Alaıda, asyq atýdan «Altyn saqa» týrnıri barlyq astanalyqtardyń qyzyǵýshylyǵyn týǵyzýy qajet. Ol úlkendi de, kishini de birdeı baýraıtyn keremet oıyn», - dep sanaıdy týrnır uıymdastyrýshylary.
Qazaqstanda keıingi jyldary ulttyq oıyndarǵa degen qyzyǵýshylyq, onyń ishinde «asyq atý» oınyna degen qumarlyq arta túsýde.
Asyq atý - bul tek oıyn ǵana emes, kóshbasshylyqqa, eptilik pen batyldyqqa tárbıeleıtin sporttyń túri bolyp tabylady. Ol qısyndy oılaý men sheberlikke baýlıdy.
«Bıylǵy jyly sporttyń ulttyq túrin nasıhattaý maqsatynda elordada asyq atýdan «Altyn saqa» jarysy ótkiziledi. Ǵalym-etnograf, jazýshy Aqseleý Seıdimbekti eske alýǵa arnalǵan týrnır besinshi ret uıymdastyrylýda», - delinedi habarlamada.
Ulttyq oıynymyz asyq atý saıysyn ótkizýdegi negizgi maqsat - ulttyq sport túrin qaıta jańǵyrtý jáne damytý, sondaı-aq, qala turǵyndary men qonaqtarynyń, ásirese, balalardyń atalǵan sport túrine degen qyzyǵýshylyǵyn arttyrý.
Týrnır 7 shildede «Dáýlet» sportkombınatynda ótedi dep josparlanǵan. Ulttyq sport túrin jetik meńgergen qaýym osy jerde bas qosady. Jeńimpazdarǵa baǵaly syılyqtar tartý etiledi.
Ulttyq oıynmen jiti tanystyrý maqsatynda Astananyń turǵyndary men qonaqtaryna asyq atý oıyny týraly ádistemelik quraldar úlestiriletin bolady.
