Asýbulaq ormanynda 20 gektarǵa jaıylǵan alapat órt sóndirildi

ÓSKEMEN. QazAqparat - Shyǵys Qazaqstan oblysynyń Ulan aýdanynda iri dala órti sóndirildi, dep habarlaıdy QazAqparat TJM baspasóz qyzmetine silteme jasap.

7 shilde saǵat 17.05-te Ulan aýdanynyń Asýbulaq orman sharýashylyǵy aýmaǵyndaǵy taýda 20 gektarǵa jaıylǵan órt sóndirildi.

Jalyn adam aıaǵy jetýi qıyn taýly, jartasty jerde tutanǵandyqtan ony sóndirý qıyndyq týǵyzdy.

Ormanshylardyń, órt sóndirýshilerdiń, jergilikti atqarýshy organdardyń jáne avıabólimshelerdiń birlesken kúshiniń arqasynda órt tolyq sóndirildi.

Tilsiz jaýmen kúreske 250-den astam adam, 26 tehnıka, «Qazavıaqutqarý» AQ, Qorǵanys mınıstrligi, ShQO áýe bólimshesiniń, «Qazáýeormankúzetiniń» 5 tikushaǵy jumyldyryldy.

Sý tógetin qurylǵylardyń kómegimen órt oshaqtaryna 125 márte sý tógildi.