«Asý» gýmanıtarlyq-tehnıkalyq kolledjiniń oqytýshylary men stýdentteri M.Joldasbekovpen kezdesedi
ASTANA. 25 mamyr. QazAqparat - Erteń, 26 mamyrynda M.Joldasbekovtyń jeke kitaphanasynda Kúltegin kúnine oraı, «Máńgilik muranyń rýhanı janashyry» taqyrybynda «Asý» gýmanıtarlyq-tehnıkalyq kolledj stýdentteriniń
QR Prezıdenttik mádenıet ortalyǵynyń dırektory M.Joldasbekovpen kezdesýi uıymdastyrylyp otyr, dep habarlady QR Prezıdenttik mádenıet ortalyǵynyń baspasóz qyzmeti.
Kezdesýdiń maqsaty - kórnekti memleket jáne qoǵam qaıratkeri, fılologııa ǵylymdarynyń doktory, professor, túrkitanýshy, Tótenshe jáne Ókiletti elshi, halqymyzdyń birtýar tulǵasy, el aǵasy Myrzataı Joldasbekovtyń ómiri men shyǵarmashylyǵyn búgingi urpaqqa tanystyrý.
Táýelsizdiktiń nurly jolymen beıbitshiliktiń týyn aspandatyp, tarıh tórinen oryn tepken «Kúltegin» eskertkishin óz atamekenine ákelgen, sondaı-aq, ózi basshylyq etken QR Prezıdenttik mádenıet ortalyǵyn kıeli qazaqtyń murasy - Abylaı hannyń, Qazybek bıdiń shapandarymen, Shiliktiden, Berelden tabylǵan ejelgi saq taıpasynyń muralarymen tolyqtyrǵan Myrzataı aǵa - erkin dalanyń erke qyrany.
Búginde ol jetkinshek jastar úshin kitaphana men murajaıdyń altyn esikterin aıqara ashyp, baǵa jetkisiz qazynaǵa qanyq etti. Ulttyq dástúrler teatry qurylyp, «Alpamys», «Ulbıke», «Báıterek» qoıylymdary kórermen nazaryna usynylǵan.
Ol óziniń eleýli eńbegi úshin el qurmetine bólenip, «Halyqtar dostyǵy» (1986), «Qurmet» (1996), «Parasat» (2005) ordenderimen, birneshe medaldarmen, túrkitaný salasyndaǵy erekshe tabystary úshin «Kúltegin» atyndaǵy syılyqpen (2004) marapattalǵan.
Atalǵan is-shara barysynda jınalǵan qaýym «Máńgilik muranyń rýhanı janashyry» taqyrybyndaǵy kitap kórmesin, aǵanyń shyr etip dúnıe esigin ashqan sátinen bergi ómir belesterinen syr shertetin slaıd, fılmdi, sonymen qatar stýdentter men ortalyqtyń beldi ártisteriniń oryndaýynda ardaqty aǵanyń qalamynan týǵan jyr shýmaqtary men ánderin tamashalaı alady.
