Asý Almabaev UFC-diń úzdik bestigine enýi múmkin

ASTANA. KAZINFORM – MMACrossfire.com saıty qazaqstandyq UFC-diń eń jeńil salmaqtaǵy ókili Asý Almabaev kelesi jekpe-jeginde jeńiske jetse, dıvızıon reıtınginiń úzdik bestigine enýi múmkin ekenin atap ótti, dep habarlaıdy Sports.kz.

Asý Almabaev 2026 jylǵy 28 aqpanda Mehıko qalasynda (Meksıka) UFC-diń burynǵy chempıony Brendon Morenomen kezdesedi. Qazaqstan ýaqyty boıynsha jekpe-jek 1 naýryz kúni tańerteń ótedi.

Basylym málimetinshe, 31 jastaǵy Almabaev qazirgi ýaqytta UFC-diń eń jeńil salmaq dárejesindegi reıtınginde jetinshi orynda tur. Ol sońǵy úsh jekpe-jeginiń ekeýinde jeńiske jetken. Sonyń ishinde qarasha aıynda Qatarda ótken UFC týrnırinde Aleks Peresti tunshyqtyrý ádisimen jeńgen.

— Almabaev aqpan aıyndaǵy jekpe-jekte iri jeńiske jetý arqyly úzdik bestikke enýge úmittenip otyr, — delingen jarııalanymda.