Asý Almabaev Ystanbuldaǵy týrnırde chempıondyq tıtýldy jeńip aldy
ASTANA. KAZINFORM – Qazaqstandyq aralas jekpe-jek sheberi Asý Almabaev Túrkııanyń Ystanbul qalasynda ótken brazılııalyq djıý-djıtsý jáne grepplıngten ACBJJ 22 týrnırinde chempıondyq tıtýldy jeńip aldy, dep habarlaıdy Sports.kz.
Qazaqstandyq sportshy 60 kelige deıingi salmaq dárejesinde Tájikstan ókili Halım Nazrýloevpen kezdesti.
All-Stars Title Match mártebesindegi tıtýldyq beldesý No-Gi erejesi boıynsha, ıaǵnı kımonomen emes, arnaıy sporttyq kıimmen kúresý formatynda ótti.
– Tartysty beldesý tolyq ýaqytqa sozylyp, onyń qorytyndysy boıynsha tóreshiler biraýyzdan Asý Almabaevty jeńimpaz dep tanydy. Osylaısha qazaqstandyq sportshy ACBJJ 22 týrnıriniń chempıondyq tıtýlyn ıelendi, – dep jazady basylym.
Aıta ketsek, Almabaev ótken aptada RAF 12 erkin kúres týrnırine de qatysqan. Ol amerıkalyq Djonnı DıDjýlıýspen kezdesip, bir jarym mınýtqa sozylǵan beldesýde jeńilip qaldy.
Al qazaqstandyq sportshynyń MMA-daǵy sońǵy resmı jekpe-jegi maýsym aıynda ótken. Ol amerıkalyq Charlz Djonsondy úshinshi raýndta sabmıshn ádisimen jeńgen.
