Astyqtyń ishki naryqqa qajet kólemi bar - mınıstrlik

NUR-SULTAN. QazAqparat – Іshki naryqty turaqtandyrý úshin astyqtyń jetkilikti kólemi bar. Bul týraly Aýyl sharýashylyǵy mınıstrliginen málim boldy, dep habarlaıdy QazAqparat tilshisi.

«Bıyl negizgi bıdaı óndirýshiler bolyp sanalatyn Reseı men Ýkraınadaǵy geosaıası jaǵdaıǵa baılanysty álemdik naryqta bıdaıǵa suranys artty. Bul faktor bıdaı baǵasyna da áser etedi. Osy oraıda 1 naýryzdan bastap ishki naryqtaǵy bıdaı baǵasy tonnasyna 116 myń teńgeden 163 myń teńgege deıin ósti. Saryaǵash stantsııasynda eksporttyq baǵa tonnasyna 270 AQSh dollarynan 410 AQSh dollaryna deıin kóterildi. Bul rette, «Azyq-túlik korporatsııasy» UK» AQ rezervterinde qajet bolǵan jaǵdaıda ishki naryqty turaqtandyrý úshin jiberilýi tıis astyqtyń jetkilikti kólemi bar», - dep atalyp ótken atalǵan vedomstvonyń QazAqparat agenttigine bergen jaýabynda.

Qazirgi ýaqytta «Azyq-túlik korporatsııasy» UK» AQ un tartý kásiporyndaryna 275 myń tonna kóleminde bıdaı jóneltý jumystaryn júzege asyryp jatyr.

«Memleket tarapynan sýbsıdııalaý esebinen bıdaı 90 myń teńge somasyndaǵy baǵamen satylady, al naryqta ortasha baǵa 160 myń teńgeni quraıdy. Bul turǵyda óńirler «áleýmettik» nandy qazirgi baǵada qamtamasyz ete alady», - delingen mınıstrlik málimetinde.

Sonymen qatar, qus sharýashylyqtaryn jemmen qamtamasyz etý maqsatynda mınıstrlik «Azyq-túlik kelisimshart korporatsııasy» UK» AQ-men, «Qazaqstannyń qus ósirýshiler odaǵy» ZTB jáne «Qazaqstannyń jumyrtqa óndirýshileri qaýymdastyǵy» ZTB-men birlese otyryp tıisti jumystardy atqardy. Osy oraıda «Azyq-túlik kelisimshart korporatsııasy» UK» AQ resýrstarynan qus sharýashylyqtaryna bir tonnasyna 117 myń teńge baǵamen jyl sońyna deıin 150 000 tonna kóleminde astyq jetkizý máseleleri boıynsha yntymaqtastyq týraly memorandým bekitildi.

Budan buryn habarlanǵandaı, Qazaqstan astyq eksporty boıynsha Eýropa Odaǵy elderiniń jańa naryqtaryna shyǵý joldaryn pysyqtap jatyr.

Aıta keteıik, Qazaqstannan bıdaı men bıdaı unyn syrtqa áketýge shekteýler engizildi.

Aýyl sharýashylyǵy mınıstrliginiń málimetinshe, bıyl astyq shyǵymy byltyrǵydan 15 paıyz joǵary bolýy múmkin.

Maýsym aıynda mınıstrlik Qazaqstandaǵy bıdaı qory jańa eginge deıin jetkilikti ekenin jarııalady.