Astyqty satyp alý jumysy tolyǵymen elektrondy formatqa kóshedi
ASTANA. QazAqparat - Elektrondy júıe kvotalardy ádil taratýǵa múmkindik beredi. Ondaıda árbir sharýanyń egistik kólemi spýtnık arqyly anyqtalady, dep habarlaıdy QazAqparat tilshisi «Aqparattyq tirkeý ortalyǵy» AQ-yna silteme jasap.
Búginde jerdi ǵaryshtan baqylaý júıesi mýltıspektraldy sýretterdi jasaı alady. Atalǵan fýnktsııanyń arqasynda egistiktiń naqty kólemin anyqtaýǵa múmkindik bar. Budan bólek, mýltıspektraldy sýretterdi jer kadastryndaǵy zańdy jáne jeke tulǵalardyń jeke málimetterimen salystyrý josparlanǵan. Osynyń arqasynda óz alqaptaryn zańsyz jalǵa berip otyrǵandardyń áreketin áshkereleýge bolady. Al, eń bastysy, astyqty satyp alý kvotasyn taratý sharalary ádil júrgiziledi.
«Máselen, bir fermerdiń ıeliginde 500 gektar jer bar deıik. Sonyń 70 gektary - jaıylym bolsa, 430 gektary - egistik jerler. 380 gektarǵa bıdaı egilse, elektrondy júıe spýtnık arqyly sonyń bárin kórip otyrady. Al árbir gektardyń ónimin Azyq-túlik korporatsııasy anyqtaıdy. Onyń kórsetkishi jalpy kvota men astyqtyń kólemine baılanysty. Shamamen bir gektardan 0,173 tonna bolady. Sonda 380 gektardy 0,173 tonnaǵa kóbeıtkende 65,74 tonna shyǵady. Demek, fermerdiń ortasha kvotasy osy», - deıdi «Aqparattyq tirkeý ortalyǵy» AQ bas mamany Qaırat Sultanbekov.
Onyń aıtýynsha, astyqty elektrondy satyp alý sharalary minagro.kz portaly negizinde júrgiziledi. Osy jumysqa Azyq-túlik korporatsııasy belsene atsalyspaq.
