Astyqty saqtaý úshin qosymsha is-sharalar qabyldanady
ASTANA. QazAqparat - Ylǵal astyqty keptirýge qajetti kólemde dızel otyny jetkiziledi. Bul týraly búgin Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti.
«Qazgıdromet» RMK derekterine sáıkes, aǵymdaǵy aıdyń úshinshi onkúndiginde negizgi astyq sebetin oblystarda (Aqmola, Qostanaı, Soltústik Qazaqstan) túndegi aýa temperatýrasy 0-den 5 gradýsqa deıin, 7-den 12 gradýs aralyǵynda bolady, al kúndiz aýa temperatýrasy 14-ten 19-ǵa deıin, 21-den 26 gradýsqa jetedi»,-dedi Q. Aıtýǵanov.
Onyń sózine qaraǵanda, osy aıdaǵy jaýyn-shashyn mólsheri Qostanaı jáne Soltústik Qazaqstan oblysynyń soltústik-batysynda qalyptan joǵary, al basqa aımaqtarda (11-den 33 mm) shamamen qalypty deńgeıde bolady dep kútilýde.
«Aǵymdaǵy merzimniń qalyptan tys aýa raıy jaǵdaılarynan (jaýyn-shashynnyń mol bolýy) kútilip otyrǵan joǵary ónimdilikti jáne boljanatyn ylǵaldy astyq kóleminiń kóp bolýyn eskere otyryp, astyqtyń saqtalýyn qamtamasyz etý úshin qosymsha is-sharalar júrgizý qajettigi týyndaýy yqtımal. Osyǵan baılanysty QR Aýyl sharýashylyǵy mınıstrligi Energetıka mınıstrligimen birlesip, ústimizdegi jylǵy jınalǵan ylǵal astyqty tazalaý men keptirý úshin qazan-qarasha aılarynda 74 myń tonna dızel otynyn jetkizý jónindegi kesteni bekitti. Onyń ishinde oblys ákimdikterimen anyqtalǵan operatorlar arqyly qazan aıynda 52 myń tonna jáne qarasha aıynda 22 myń tonna dızel otynyn bosatý josparlanǵan»,-dedi birinshi vıtse-mınıstr.
