Astyqty der ýaqytynda jınamasaq úlken shyǵyn bolýy múmkin - Ó.Shókeev

ASTANA. QazAqparat - Astyqty der ýaqytynda jınamasaq úlken shyǵyn bolýy múmkin. Bul týraly búgin QR Úkimetiniń selektorlyq rejimdegi otyrysynda QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev aıtty, dep habarlaıdy QazAqparat tilshisi.

«Jaýyn shashyn egin jınaý naýqanyna biraz kedergi keltirip otyr. Soǵan qaramastan óńirlerde qarqyndy jumys júrgizilýde. Búgingi tańda egistik alqaptarynyń 73 paıyzy bastyrylyp, 14 mıllıon tonnadan astam astyq jınaldy. Onyń ishinde Qostanaı oblysy 85 paıyzdan asyp, byltyrǵy deńgeıge jaqyndap qaldy. SQO-da 70,8 paıyz bastyryldy», -dedi ol.

Onyń dereginshe, egin bastyrý jumystarynda artta kele jatqan óńirler de bar. Máselen, Aqmola oblysy astyq alqabynyń - 60, Qaraǵandy oblysy - 57, Pavlodar oblysy 58 paıyzyn ǵana bastyryp úlgergen.

«Aldyńǵy aptada aýa raıynyń boljamy jaqsy, osyny paıdalanyp, eki-úsh oblystyń ákimderi qosymsha sharalardy qolǵa alýy kerek. Óıtkeni, bul astyqty jınap almasaq, úlken shyǵyn bolýy múmkin.  Jalpy shyǵymy jaman emes, túsimi gektaryna 13 tsentnerden aınalýda. Alda orylatyn alqaptar túsimi joǵary bolýy tıis. Sondyqtan kórsetkishti arttyrýǵa múmkindik bar», - dedi Ómirzaq Shókeev.