Astyq jınaý naýqanyn ýaqytyly aıaqtaý qajet - Baqytjan Saǵyntaev
ASTANA. QazAqparat - Búgin Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev astyq jınaý naýqanyn der ýaqytynda aıaqtaýdy tapsyrdy, dep habarlaıdy QazAqparat tilshisi.
«Ózderińiz kórip otyrǵandaı jaýyn-shashyn kedergi bolyp, egin jınaý ýaqyty kesheýileýde. Byltyrǵy jylmen salystyrǵanda kórsetkishterimiz 20-25 paıyzǵa tómen. Degenmen, qazirgi kúngi aýa raıynyń qolaılylyǵyn paıdalana otyryp, astyq jınaý naýqanyn ýaqytynda bitirýdi qolǵa alýdy tapsyramyn», - dedi Úkimet basshysy.
Sonymen qatar Premer-Mınıstr ákimderdiń dızel otynyn qosymsha bólý jónindegi usynystaryn Energetıka mınıstrligi qarap, usynys berýi tıistigin basa aıtty.
«Asqar Uzaqbaıuly (QR Premer-Mınıstriniń orynbasary - Asqar Mamın), óńirlermen taǵy da bir qarap ótińiz jáne Aqmola oblysynyń ókili aıtqandaı qazannan qyrkúıekke aýystyrý (qazanda jetkizilýi tıis dızel otynynyń kólemin) múmkindigi bolsa, Energetıka mınıstrligimen sheshim shyǵarýdy tapsyramyn. Ómirzaq Estaıuly (QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev) kúnsaıynǵy monıtorıng jáne jumysty úılestirý Sizdiń baqylaýyńyzda», - dep atap ótti Baqytjan Saǵyntaev.
Aıta keteıik, otyrysta QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev egin jınaý naýqanyn qazan aıynyń birinshi onkúndiginde aıaqtaýǵa múmkindik bar ekenin aıtqan bolatyn.
