Astyq ysyrap bolýy múmkin – Saparhan Omarov egin jınaý kezinde qaýip baryn eskertti

NUR-SULTAN. QazAqparat – Aýyl sharýashylyǵy mınıstrligi Saparhan Omarov oblys ákimderin eskertip, kúzgi egin jınaý kezeńindegi aýa raıynyń jaısyzdyǵyn esepke alýdy aıtyp ótti, dep habarlaıdy QazAqparat tilshisi.

«Qazgıdromettiń uzaq merzimdi aýa-raıy boljamyna sáıkes qyrkúıekte batys oblystarda bastapqy kezeńde temperatýranyń 30°S deıin kóterilýi, sodan soń 20°S-qa deıin aqyryndap tómendeýi kútiledi. Normadan joǵary jaýyn-shashynnyń jaýatyny da boljanyp otyr. Mundaı jaǵdaılar astyqtyń pisip-jetilýine qolaıly bolǵanymen, egin jınaý jumystaryn qıyndatýy múmkin», - dedi mınıstr Úkimet otyrysynda.

Saparhan Omarovtyń aıtýynşa, bir aıdaǵy jaýyn-shashyn mólsheri Qostanaı oblysynyń soltústiginde normadan joǵary, Soltústik Qazaqstan oblysynda normaǵa shamalas, Aqmola oblysynda normadan tómen bolatyny boljanǵan.

«Keı jerde úshinshi onkúndiktiń birinshi jartysynda jaýyn-shashyn qarǵa aýysady. Bul egin jınaý jumystarynyń barysyna áser etip, astyqtyń ysyrap bolýyna ákelýi múmkin. Osyǵan oraı ákimdikter egin jınaý jumystary boıynsha barynsha qysqa merzim ishinde uıymdastyrý sharalaryn qoldanýlary qajet», - dedi ol.

Mınıstr budan basqa, problemalyq agroholdıngter jerlerindegi egindi jınaýdyń mańyzdylyǵyn bólek másele retinde aıta ketti.

«Úkimettiń qoldaýymen agroholdıngterdiń ózderi, jańa ınvestorlar egis jumystaryn júrgizdi. Olardyń endigi mindeti egin jınaý jumystaryn uıymdastyrý. Aqmola, Aqtóbe, Qostanaı jáne Soltústik Qazaqstan oblystarynyń ákimdikteri máseleni jeke baqylaýlaryna alýlary qajet. Jalpy jumys shtattyq rejimde júrgizilip jatyr. Maıly daqyldar boıynsha jaqsy nátıjeler kútiletinin aıta ketken jón», - dedi Saparhan Omarov.

Eske sala ketsek, búgingi Úkimet otyrysynda Premer-Mınıstr Asqar Mamın Aýyl sharýashylyǵy mınıstri men oblys ákimderine egin oraǵyn sapaly júrgizýdi mindettegen bolatyn.

Óz kezeginde Energetıka mınıstri Qanat Bozymbaev dıqandarǵa dızel qanshadan satylýy kerektigin aıtty.