Astyq tasymaldaý tarıfterine monıtorıng júrgizý kerek - Májilis
«Eldiń altyn qory – astyqtan daıyndalatyn áleýmettik mańyzy bar azyq-túlik ónimderi baǵasynyń ósýi dándi daqyldardy tasymaldaý qunynyń ósýine de baılanysty ekeni qupııa emes. Óndirýshilerdiń aýyl sharýashylyǵy ónimderine 2020 jylǵy baǵa ındeksi 115,3 paıyzdy qurasa, ósimdik sharýashylyǵy ónimderine baǵa 17,6 paıyzǵa ósken. Onyń ishinde dándi daqyldar baǵasynyń ósýi 18,8 paıyz bolsa, ósimdik sharýashylyǵyndaǵy óndirýshiler baǵasynyń ózgerýi sońǵy bes jylda 67,6 paıyzdy quraıdy», - dep toqtaldy depýtat Májilistiń jalpy otyrysynda QR Básekelestikti qorǵaý jáne damytý agenttigi tóraǵasynyń atyna joldaǵan saýalynda.
Onyń aıtýynsha, baǵanyń ósýine áser etetin faktorlardyń biri - shıkizatty óńdeýshi kásiporynǵa deıin tasymaldaý. Eldegi astyq tasymaldaý naryǵynda «Astyq Trans» aktsıonerlik qoǵamy basymdyqqa ıe, atalǵan zańdy tulǵa temirjol kóligindegi barlyq astyq tasymalynyń 50 paıyzǵa jýyǵyn qamtıdy. 2020 jyly bul kompanııa ishki astyq tasymaldaý kóleminiń 74 paıyzyn jáne barlyq eksporttyq astyqtyń 40 paıyzyn tasymaldaǵan.
«Qazaqstan naryǵynda ústem jaǵdaıyn paıdalanyp, bul kompanııa óz qyzmetteriniń qunyn birneshe ese arttyryp otyr. Atap aıtqanda, sońǵy bes aıda tasymaldaý quny tórt ese artyp, bir vagon úshin tasymaldaý baǵasy orta eseppen 60 myń teńgege qymbattaǵan.
Mysaly, ótken jyldyń qyrkúıek aıynda dándi daqylardy elimizdiń soltústiginen ońtústikke jetkizý quny bir vagonǵa 471 425 teńgeni qurasa, aǵymdaǵy jyldyń qańtar aıynda 537 148 teńgege deıin ósken. Aıyrmashylyǵy - 65 723 teńge», - dedi B. Bekjanov.
Onyń sózine qaraǵanda, dándi daqyldardan daıyndalatyn jem baǵasynyń ósýi mal sharýashylyǵy ónimderiniń qunyna áser etetini daýsyz. Ótken jyly onyń baǵasy 4,2 paıyzǵa kóterilgen.
«Astyq tasymaldaý boıynsha kólik qyzmetteri tarıfteriniń osyndaı kóterilýine sebep bolatyn faktorlarǵa erekshe nazar aýdarý kerek dep sanaımyz. Quzyretti organdar astyq tasymaldaý boıynsha ústem jaǵdaıǵa ıe sýbektilerge zań aıasynda baqylaýdy júzege asyrýǵa tıis. Osyǵan baılanysty, Agenttik tarapynan elimizde astyq tasymaldaý tarıfterine monıtorıng júrgizý kerek.
Ekinshiden, «Astyq Trans» aktsıonerlik qoǵamy tarapynan astyq tasymaly baǵasynyń ósý faktisiniń zańdylyǵy men negizdiligine quqyqtyq turǵydan baǵa bergen jón», - dedi Berik Bekjanov.
