Astyq saqtaýdaǵy problemalar jergilikti sıpat alǵan jáne tek jekelegen aýyl sharýashylyǵy taýaryn óndirýshilerde ǵana týyndap otyr - A. Mamytbekov
TANA. 10 qazan. QazAqparat /Qanat Mámetqazyuly/ - Bıylǵy jylǵy kútilip otyrǵan astyq óniminiń rekordtyq kórsetkishke jetýi - úlken ıgilik. Alaıda, bunyń ózi jekelegen problemalardyń týyndap jatqanyn aıqyndaıdy. Degenmen elimizdegi astyq saqtaý problemalary jappaı sıpat alyp otyrǵan joq.
Búgin QR Parlamenti Májilisinde «Astyq salasy: jaǵdaıy men perspektıvalary» atty taqyrypta ótken Úkimet saǵatynda Aýyl sharýashylyǵy mınıstri Asyljan Mamytbekov osylaı málimdedi.
Mınıstrdiń aıtýynsha, búgingi kúni Qazaqstandaǵy astyq saqtaýdyń syıymdylyǵy 22,5 mln. tonnany quraıdy. Bunyń ishinde lıtsenzııalanǵan astyq qabyldaý kásiporyndary - 13,6 mln. tonna, aýyl sharýashylyǵy qurylymdarynyń astyq qoımalary - 8,9 mln. tonna. Buǵan qosa ashyq alańqaılarda 2,5 mln. tonnaǵa deıin astyq saqtaýǵa bolady. «Bıdaıdy polımerlik qaptarda saqtaý tájirıbesi de sońǵy jyldary keńinen qoldanylýda. Sondaı-aq astyqty óz tehnologııalyq syıymdylyqtary bar un tartatyn kásiporyndary da qabyldap otyr», - deıdi A. Mamytbekov.
Mınıstrdiń sózine qaraǵanda, oblys ákimdikteriniń usynysy boıynsha egin oraǵy naýqany barysynda jınalǵan qurǵaq astyqtyń basym bóligi qabyldaý kásiporyndaryndaǵy syıymdylyqtar bosaǵanǵa deıin 8,9 mln. tonna astyqty saqtaýǵa múmkindik beretin astyq qoımalarynda jınaqtaldy. Bul tásil óz kezeginde egin oraǵy aıaqtalar tusta shabylǵan ylǵaldylyǵy joǵary astyqty qabyldaýǵa múmkindik berip, qabyldaý kásiporyndaryndaǵy 30-40 paıyz syıymdylyqty bos ustaýǵa septigin tıgizgen.
«Sońǵy kezderi «astyq saqtaýǵa qatysty jańa qýatty nysandar iske qosylmaǵan» degenge saıatyn syndar aıtylyp jatyr. Bul shyndyqqa janaspaıdy. Máselen, 1991 jyldan beri qaraı syıymdylyǵy 2 mln. tonnany quraıtyn 58 astyq qabyldaý kásiporny salyndy. Onyń ishinde sońǵy 5 jylda 672 myń tonnalyq nysan iske qosyldy. Budan bólek, aýyl sharýashylyǵy taýarlaryn óndirýshiler 651 myń tonnalyq 42 astyq qoımasyn ózderi salyp aldy. Al qazirgi tańda naqtylap aıtqanda astyq elevatorlarynyń tolýy 70 paıyzdy quraıdy», - deıdi A. Mamytbekov.
