Astyq saqtaý máselelerin aýyl sharýashylyǵy taýarlaryn óndirýshiler ózderi sheshýleri qajet - A. Mamytbekov
TANA. 10 qazan. QazAqparat /Qanat Mámetqazyuly/ - «Astyq saqtaý máselelerin eń aldymen aýyl sharýashylyǵy taýarlaryn óndirýshiler ózderi sheshýleri qajet.
Ol úshin barlyq jaǵdaılar jasalǵan. Buǵan arnaıy nesıelik baǵdarlamalar ashylyp, jeńildetilgen paıyzdar da usynylyp otyr». Búgin QR Parlamenti Májilisinde «Astyq salasy: jaǵdaıy men perspektıvalary» atty taqyrypta ótken Úkimet saǵatynda Aýyl sharýashylyǵy mınıstri Asyljan Mamytbekov osylaı málimdedi.
Sonymen qatar, sóz arasynda mınıstr eldegi astyq saqtaý qoımalaryn damytý máselesi de jiti nazarda ekendigin jetkizdi. «2010-2014 jyldarǵa arnalǵan agroónerkásip keshenin damytýdyń memlekettik baǵdarlamasynda saqtaý qaýattylyǵyn 16 mln. tonnaǵa deıin jetkize otyryp, elevatorlar salýdy qarastyratyn ınvestıtsııalyq jobalardy iske asyrý kózdeledi. Sondaı-aq 2010 jyldan beri «QazAgro» ulttyq holdınginiń qatysýymen jalpy saqtaý syıymdylyǵy 327 myń tonnany quraıtyn 13 astyq qoımasy qoldanysqa berildi», - deıdi A. Mamytbekov.
Budan bólek, vedomstvo basshysy jaqyn kúnderi syıymdylyǵy 109 myń tonnany quraıtyn 3 astyq qoımasyn qoldanysqa engizý kútilip otyrǵanyn málim etti.
«Osyny eskersek, astyq saqtaýǵa qatysty problemalardyń jergilikti sıpatta ekendigin jáne jekelegen aýyl sharýashylyǵy taýarlaryn óndrýshilerde týyndap otyrǵanyn ańǵaramyz. Atap aıtqanda problema negizinen ózderinde saqtaý syıymdylyqtary joq ári qashyqtaý óńirlerde ornalasqan qoımalarǵa astyǵyn jetkizý úshin shyǵyn shyǵarǵysy kelmeıtin aýyl sharýashylyǵy taýarlaryn óndirýshilerde ǵana týyndap otyr. Sondyqtan jınalǵan astyqty túgel ysyrap qylǵansha, kólik shyǵyny bolsa da elevatorlarǵa jetkizýdi júkteý kerek», - deıdi A. Mamytbekov.
