Astyq naryǵynda táýelsiz bolý úshin Qıyr Shyǵystan qosymsha termınal salǵan durys - depýtat R. Madınov
TANA. 10 qazan. QazAqparat /Qanat Mámetqazyuly/ - Astyq naryǵynda syrtqy faktorlardan barynsha táýelsiz bolý úshin Reseıdiń Qıyr Shyǵysynan qosymsha termınal salǵan durys.
Búgin QR Parlamenti Májilisinde «Astyq salasy: jaǵdaıy men perspektıvalary» atty taqyrypta ótken Úkimet saǵatynda qosymsha baıandama jasaǵan Agrarlyq máseleler komıtetiniń tóraǵasy, depýtat Romın Mádınov osylaı málim etti.
«Astyq máselesinde Qazaqstan eksportqa baǵdarlanǵan memleket bolǵandyqtan, kóp jaǵdaıda syrtqy faktorlarǵa táýeldimiz. Onyń ústine Qazaqstan astyq eksporttaıtyn álemniń bestigine engenimen, biz olardyń ishinde teńizge shyǵa almaıtyn jalǵyz memleket bolyp otyrmyz. Al astyqpen álemdik saýdanyń barlyǵy teńiz arqyly jasalady. Osy turǵydan alǵanda biz syrtqy faktorlardan jetkilikti túrde táýelsiz emespiz», - dedi R. Mádınov.
Osy rette depýtat Iran baǵytynda atqarylyp jatqan sharalardy quptaıtynyn aıtyp ótti. «Degenmen Iran byltyrǵy jyly ákelinetin astyqqa baj engizip, ózin asa senimdi áriptes retinde kórsete almady», - deıdi ol. Depýtattyń paıymynsha, Qazaqstanǵa ózine tıesili termınal aýadaı qajet. Bundaı termınaldyń biri Qara teńizde salynyp jatyr. «Budan bólek, taǵy bir termınaldy Reseıdiń Qıyr Shyǵysynda Vladıvostokta, Nahodka mańynda salǵan durys. Osy baǵyttaǵy máselelerdiń bárin Kedendik odaq arqyly retteýge bolady. Sonda ǵana biz astyq salasynda syrtqy faktorlardan táýelsiz bola alamyz. Óıtkeni Ońtústik-Shyǵys óńirlerine shyǵa alatyn taǵy bir naryqtyq baǵyt bolsa, erkinirek qımyldaımyz. Óıtkeni Qara teńiz arqyly astyq shyǵaratyn Reseı ol jaqqa kóp jolaı bermeıdi», - deıdi R. Mádınov.
