Astyq kooperatıvteriniń jańa baǵdarlamaǵa qatysy joq - «QazAgro» xoldıngi
ASTANA. QazAqparat - Aǵymdaǵy jylda aýylsharýashylyq kooperatıvterin ekinshi deńgeıli bankter arqyly qarjylandyrý baǵdarlamasy jalǵasady. Máselen, bıyl egin sharýashylyǵy salasynda 12 kooperatıv qarjylandyrýǵa ótinish jasady, dep xabarlaıdy QazAqparat tilshisi.
«Bul - tek astyqpen aınalysatyn kooperatıvter ǵana. Basqa salalar boıynsha olardyń sany áldeqaıda kóp. Sút, et salasynda kooperatıvter barshylyq. Biz ol kooperatıvterge qatysty naqty statıstıkany áli de jarııalaıtyn bolamyz», - dedi «QazAgro» xoldıngi» AQ basqarma tóraǵasynyń orynbasary Aıgúl Muxamadıeva QazAqparat tilshisine bergen suxbatynda.
Onyń aıtýynsha, astyq kooperatıvteri bólek baǵdarlama boıynsha qarjylandyrylyp otyr. Ondaı kooperatıvterdiń ishinde 3 mlrd. teńgege deıin zaım alyp jatqan sharýashylyq birlestikteri de bar. Sebebi ol kooperatıvtiń ishinde 100-ge jýyq taýar óndirýshi bar.
«Al sút pen et kooperatıvteri agroónerkisip keshenin damytýdyń jańa baǵdarlamasy aıasynda qarjy alatyn bolady. Onda ınvestıtsııalyq sýbsıdııalar bar, ıaǵnı qural-jabdyqtarǵa ketken shyǵynnyń 50 paıyzy memlekettiń tarapynan óteledi. Astyq kooperatıvteri tek kóktemgi egistik jumystaryna ǵana nesıe alady», - dep atap kórsetti Muxamadıeva.
