Astyq keptiretin qurylǵy úshin 42 myń tonna janar-jaǵarmaı bólinedi - QR AShM

ASTANA. 23 tamyz. QazAqparat - Jańa astyq ónimin keptirý úshin astyq qabyldaý kásiporyndarynyń ıeleri men astyq keptirgishteri bar aýyl sharýashylyǵy taýaryn óndirýshilerge qosymsha 42 myń tonna tómendetilgen baǵamen dızeldik otyn bólinedi.

Bul týraly QR aýyl sharýashylyǵy vıtse-mınıstri Múslim Ómirııaev Aqmola oblysynyń astyq qabyldaý kásiporyndaryna jasaǵan baspasóz týry kezinde málimdedi.

M.Ómirııaevtiń sózine qaraǵanda, bıylǵy jyly astyq ónimderiniń ylǵaldylyǵy joǵary bolady dep kútilýde. Soǵan baılanysty mınıstrlik astyq qabyldaý kásiporyndary men aýyl sharýashylyǵy taýaryn óndirýshilerge sáıkes sharalardy qolǵa alyp, astyq qabyldap, saqtaýǵa arnalǵan qosymsha syıymdylyqty arttyrýdy, astyqty bólip jınaýǵa daıyn bolýǵa keńes beredi.

Aýyl sharýashylyǵy mınıstrliginiń málimeti boıynsha, Qazaqstanda 213 lıtsenzııaly astyq qabyldaý kásiporny jumys isteıdi. Olardyń jalpy astyq saqtaý syıymdylyǵy - 13,9 mıllıon tonna. Sonymen qatar, aýyl sharýashylyǵy taýaryn óndirýshilerinde 10,7 mıllıon tonna astyq saqtaıtyn oryn bar. Respýblıka boıynsha astyq saqtaýǵa arnalǵan syıymdylyq 24 mıllıon tonnadan asady.

Búgingi tańda 213 astyq qabyldaıtyn kásiporynnyń 187-si tekserilip, olardyń 139-y astyq qabyldaýǵa daıyn dep tanyldy.

Úkimet otyrysynda habarlanǵandaı, bıyl elde 16 mıllıon tonna astyq jınalady dep kútilýde. Astyq eksportynyń áleýeti shamamen 9 mln. tonnany quraıdy.