Astyq kásiporyndarynda astyq esebi qujaty engiziledi
ASTANA. QazAqparat - Búgin Senatyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine astyq naryǵyn retteý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylanyp, qabyldandy. Endi zań Memleket basshysynyń qol qoıýyna joldanady.
Zań jobasy boıynsha elektrondyq astyq qolhattary júıesi men astyq qabyldaý nemese maqta óńdeý uıymyn ýaqytsha basqarýdy jetildirý kózdeledi. Atap aıtqanda, laýazymdy adamdar tarapynan sharýashylyq júrgizýshi sýbektilerdiń qyzmetine aralasýdyń zańdylyǵy men negizdiligin qamtamasyz etý qarastyrylady. Osy maqsatta zań jobasynda sottyń astyq qabyldaý kásipornyna nemese maqta óńdeý uıymyna ýaqytsha basqarý engizý kózdeledi.
«Qujattyń basty maqsaty astyq qabyldaý kásiporyndaryna astyq ótkizgenin rastaıtyn astyq esebi qujatyn engizý bolyp tabylady. Aýyl sharýashylyǵy salasyna ınvestıtsııa tartýdyń qarjylyq quraly bolyp tabylatyn astyq qolhatynyń aınalymyn quqyqtyq retteý jetildiriledi», - dedi senator Jeńis Nurǵalıev.
Zań aıasynda astyq qolhattary memlekettik elektrondyq tizilimniń júıesine enetin bolady. Osy maqsatta astyq qolhattary aınalymynyń ashyqtyǵyn jáne ishki naryqtaǵy astyq aınalymyn taldaýdy qalyptastyrýdy qamtamasyz etý normalary engiziledi.
