Astyq qabyldaý kásiporyndaryna qosymsha tabys alýǵa múmkindik berilmek
NUR-SULTAN. QazAqparat - Astyq qabyldaý kásiporyndaryna qosymsha tabys alý tetigi engiziledi. Bul týraly Parlament Májilisiniń jalpy otyrysynda agroónerkásiptik keshendi retteýge arnalǵan zań jobasyn talqylaý barysynda QR Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.
Ákimshilik kedergilerdi joıý máselesine toqtalǵan mınıstr, «196 lıtsenzııalanǵan astyq qabyldaý kásipornynyń negizgi qyzmeti «Astyq týraly» QR Zańynda belgilengen tizbemen shektelgen. Atalǵan kásiporyndar temirjoldardy basqa sýbektilerdiń paıdalanýyna berý, jarma ónimin ótkizý, maıly tuqymdardy óńdeý jáne ótkizý tárizdi qosymsha qyzmetterdi kórsete alady. Osy múmkindikter «Astyq týraly» zańda kózdelmegen, bul astyq qabyldaý kásiporyndaryna qosymsha tabys alýǵa múmkindik bermeıdi. Qolaıly bıznes orta qurý maqsatynda zań jobasymen «Astyq týraly» Zańǵa ózgerister engiziledi, ol ózgerister astyq qabyldaý kásiporyndarynyń joǵaryda atalǵan qyzmet túrlerimen aınalysýyna quqyq beredi», - dedi Saparhan Omarov.
Budan basqa, Qazaqstan Respýblıkasynyń qoldanystaǵy zańnamsyna sáıkes, zalaldanǵan ósimdik sharýashylyǵy ónimderin óńdeýge tyıym salynǵan. Alaıda Eýrazııalyq ekonomıkalyq odaqtyń Biryńǵaı karantındik fıtosanıtarııalyq talaptaryna sáıkes, eger karantındik aramshópterdiń tuqymdary men jemisterin tirshilik qabiletinen aıyratyn tehnologııalardy qoldansa, astyq óńdeıtin uıymdarǵa zalaldanǵan shıkizatty óńdeýge ruqsat etilgen.
«Otandyq jetkizýshilerdiń osy jaǵdaıyn eńserý úshin zań jobasynda, eger, karantındik aramshópterdiń tuqymdary men jemisterin tirshilik qabiletinen aıyratyn tehnologııalardy qoldansa, zalaldanǵan shıkizatty óńdeýge qoıylǵan tyıymdy alyp tastaý kózdeledi», - dedi mınıstr.
Aıta keteıik, zań jobasynda joǵaryda atalǵan túzetýlerden basqa, orman jáne sý sharýashylyǵyn, janýarlar álemin jáne erekshe qorǵalatyn aýmaqtardy damytý boıynsha ózgerister kózdeledi.
Budan buryn habarlanǵandaı, búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
