Astyq eksportyn jandandyrý úshin ony tasymaldaý shyǵynyn azaıtý sharalary qarastyrylýda - A. Kúrishbaev
ASTANA. Qarashanyń 9-y. QazAqparat /Qanat Mámetqazyuly/ - Qazaqstandyq astyq eksportyn jandandyrý úshin ony tasymaldaýǵa ketetin shyǵyndy azaıtý sharalary qarastyrylyp otyr.
Búgin QR Parlamenti Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti, dep habarlaıdy QazAqparat.
«Bul rette astyqty tasymaldaý shyǵynyn arzandatý Reseı Federatsııasynyń terrıtorııasy arqyly tranzıt boıynsha júrgiziletini qarastyrylýda. Bul maqsattarǵa Úkimettik rezervten aǵymdaǵy jyly 5 mlrd. teńge bólinip otyr. Al kelesi jyly bıýdjetten taǵy da 10 mlrd. teńge jumsalatyn bolady. Al ondaı tarıfterdi arzandatýdyń tıisti tetikterimen qazirgi tańda Kólik jáne kommýnıkatsııalar mınıstrligi aınalysýda», dedi A. Kúrishbaev.
Sonymen qatar, mınıstrdiń aıtýynsha, Kólik jáne kommýnıkatsııa mınıstrligine eksporttaýshylardy ýaqtyly astyq tasymaldaý kólikterimen qamtamasyz etý mindeti tapsyrylǵan. Budan ózge, Aqtaý portynda Aýǵanstan men Iran baǵytyna astyq termınalynyń ótkizý múmkindikterin keńeıtý, Ýkraına, Ózbekstan, Túrikmenstan aýmaǵyna qaraı reseılik temir joldar boıynsha tarıfterdi tómendetý sharalary júrgizilip otyr.
