Astyq eksporttaýshylarǵa qun salyǵynyń artyq somasyn qaıtarý merzimi uzartylmaq

ASTANA. QazAqparat – Astyq naryǵyna qatysýshylarǵa salynatyn qosymsha qun salyǵynyń asyp ketken somasyn qaıtarý jónindegi pılottyq jobany iske asyrý merzimi uzartylýy múmkin. Bul týraly Qarjy mınıstrliginiń Memlekettik kirister komıteti ashyq talqyǵa shyǵarǵan buıryǵynda jazylǵan, dep habarlaıdy QazAqparat tilshisi.

«Pılottyq joba Qazaqstan Respýblıkasynyń aýmaǵynda astyq naryǵyna qatysýshylarǵa qatysty 2021 jylǵy 1 jeltoqsannan 2024 jylǵy 30 maýsymǵa deıin iske asyrylady», - delingen buıryqtyń jańa redaktsııasynda.

Burynǵy talap boıynsha atalǵan ilki joba bıyl 31 jeltoqsanda aıaqtalýy tıis bolatyn. Komıtet dereginshe, belgilengen merzimniń aǵymdaǵy jyly aıaqtalýy astyq óndirisi men onyń eksporttyq kezeńderine tolyq taldaý júrgizýge múmkindik bermeıdi. Al pılottyq jobanyń merzimin uzartý - astyq naryǵyna qatysýshylardy kóbirek tartýǵa sep bolmaq.

Qosymsha qun salyǵynan asyp ketken somany qaıtarý úshin eksporttaýshy memlekettik kirister organdaryna ótinish joldaýy qajet.

Qaıtarýǵa jatatyn qosymsha qun salyǵynyń asyp ketken somasyn aıqyndaý kezinde mynalar eskeriledi:

- QR «Valıýtalyq retteý jáne valıýtalyq baqylaý týraly» Zańynda aıqyndalǵan tártippen ashylǵan QR aýmaǵyndaǵy ýákiletti bankterdegi salyq tóleýshiniń banktik shottaryna valıýtalyq túsim túsken taýarlar eksporty;

- EAEO kedendik aýmaǵynan eksporttyń kedendik rásiminde taýarlardy áketý faktisi;

- «AstyqQoyma» AJ-degi astyqtyń shyǵarylýy men qozǵalysy.

Buıryqty ashyq talqylaý 5 jeltoqsanǵa deıin jalǵasady.