Astronomdar Jerdi aınalyp ótken egiz asteroıdty sýretke túsirdi
1999 KW4 - biri negizgi, ekinshisi shaǵyn eki asteroıdtan turady. Kishi syńary tabıǵı serigi syqyldy úlkenin 2,6 km qashyqtyqta aınalyp júredi. 26 mamyr kúni asteorıd Jerden 5,2 mln km qashyqtyqtan ushyp ótti.
Eýropa ońtústik observatorııasynyń ǵalymdary egiz asteroıdtyń orbıtasy týraly birshama aqparattar baryn, ol Jer úshin eshqandaı qaýip tóndirmeıtinin aıtyp sendirdi.
Asteroıdty anyqtaý úshin ǵalymdar VLT (Very Large Telescope) alyp teleskopyn paıdalanǵan. Observatorııanyń astronomy Olıve Enonyń sózine qaraǵanda, alynǵan derekter Jerge qulaý qaýpi bar asteroıdtardan qorǵanýdyń tıimdi strategııalaryn ázirleýge septigin tıgizedi.
«Osy málimetter asteroıdtyń Jer betinde jáne atmosferasynda qandaı kúıge enetinin boljaý úshin asa mańyzdy», - dedi ǵalym.
Eýropa ońtústik observatorııasynyń ókilderiniń aıtýynsha, 1999 KW4 asteroıdynyń Didymos jáne onyń serigi Didymoon asteroıdyna uqsas tustary barshylyq. Ǵalymdar bolashaqta Didymos asteroıdy Jerge qaýip tóndirýi múmkin ekenin aıtady.
