Astronomdar «tym úlpildek» ǵalamsharlardy anyqtady
ASTANA. KAZINFORM – Astronomdar kólemi ıÝpıterden úlken, biraq tyǵyzdyǵy maqta kámpıtinen de tómen ǵalamsharlardy anyqtady, dep habarlaıdy Deutsche Welle.
Bul eki ǵalamshar Jerden 1000 jaryq jylynan astam qashyqtyqta ornalasqan. Olar – adamzat anyqtaǵan Kún júıesinen tys eń iri ǵalamsharlar (ekzoplanetalar).
Sonymen qatar bular – ázirge belgili eń jeńil ǵalamsharlar. Bul týraly zertteý jetekshisi, Oksford ýnıversıtetiniń ǵalymy Djordj Dransfıld málimdedi. Zertteý nátıjeleri Monthly Notices of the Royal Astronomical Society jýrnalynda jarııalandy.
– Bul eki ǵalamshardyń tyǵyzdyǵy ballonnan jańa ǵana shyǵarylǵan qyryný kóbiginiń bir bóligimen shamalas, – dedi Dransfıld.
Ǵalymnyń boljamynsha, bul ǵalamsharlar aq nemese kógildir tústi bolýy múmkin jáne negizinen sýtegi men gelııden turady. Alaıda olardyń hımııalyq quramyn naqtylaý úshin qosymsha baqylaýlar qajet.
Mundaı asa jeńil ekzoplanetalar óte sırek kezdesedi. NASA katalogyndaǵy 6300 ekzoplanetanyń ishinde olardyń sany 40-qa da jetpeıdi.
– Sırek kezdesetin ǵalamsharlar júıesin zertteý arqyly biz ǵalamsharlardyń qalaı qalyptasatyny týraly ǵylymı jumbaqtyń taǵy bir bóligin tolyqtyryp, Ǵalamdaǵy ornymyzdy tereńirek túsine alamyz, – dedi Djordj Dransfıld.
Aıta keteıik, buǵan deıin Qus jolynan bógde galaktıkanyń izi tabylyp, ǵalymdar oǵan erekshe at qoıǵanyn jazdyq.
Al Veneraǵa ushý nege múmkin emes ekenin myna jerden oqı alasyz.
