Astronomdar Qus jolynan qupııa nysan anyqtady
ASTANA. KAZINFORM - Ulybrıtanııa men Germanııanyń astronomdar toby Qus jolynan barlyq belgili neıtrondyq juldyzdardan aýyr jáne bul rette eń jeńil qara qurdymnan jeńilirek jańa qupııa nysandy anyqtady, dep jazdy VVS.
Bul nysan orbıtada mıllısekýndtyq pýlsardy (aınalý kezeńi 1-den 10 mıllısekýndqa deıingi dıapazondaǵy pýlsar) aınalyp, bizden 40 myń jaryq jyl qashyqtyqta ornalasqan.
Nysandy ashqan Manchester ýnıversıtetiniń jáne Mıýnhendegi Maks Plank ınstıtýty zertteýshileriniń shamalaýynsha, bul Eınshteınniń salystyrmalylyq teorııasyn taǵy bir tekserip, qara qurdymǵa jańa kózqaras qalyptastyrýǵa múmkindik beretin pýlsar men qara qurdymnyń alǵashqy tanymal qosarlanǵan júıesi.
«Pýlsar-qara qurdym júıesi gravıtatsııa teorııasyn tekserýdiń mańyzdy múmkindigi, al aýyr neıtrondyq juldyz ıadrolyq fızıkaǵa óte joǵary tyǵyzdyqtaǵy protsester týraly jańa túsinikter beredi», - dep boljady Manchester ýnıversıtetiniń astrofızıgi, professor Ben Stappers.
