Astronomdar 2028 jyly Jer joıqyn asteroıdpen soqtyǵysady dep boljaýda
ASTANA. QazAqparat - 12 jyldan keıin Jer planetasy tutas qurlyqty joıa alatyn úlken asteroıdpen soqtyǵysýy múmkin. Bul týraly amerıkandyq astronomdar habarlady, biraq qaı qurlyq ekenin aıtpady, dep habarlaıdy Rosbalt.
1997 XF 11 ǵarysh obektisiniń dıametri 2,5 shaqyrym. Qazir ol jerden 25 mıllıon shaqyrym qashyqtyqta. Asteroıd 2028 jyly Jerge jaqyndap, úlken apat oryn alýy múmkin.
Dál qazir ǵalymdar bul týraly nyq senimmen aıta almaı otyr. Al NASA ǵalymdary kezdeısoq soqtyǵysty boldyrmaý tásilderin izdep, máseleni muqııat zertteýde.
Erterekte baspasóz betterinde brıtan ǵalymdary aldaǵy 5 jylda bolýy múmkin álemdik apattardyń stsenarııin qurǵany aıtylǵan edi. Onda zertteýshiler Jer betiniń kem degende 750 mıllıon halqyna qaýip tóndiretin oqıǵalardy jazǵan.
Olardyń oıynsha, iri asteroıdtyń qulaýy nemese janartaýdyń atqylaýy sekildi tabıǵı apattar adamzat úshin úlken qaýip tóndiredi. Jáne aıtylǵan qaýipterdiń bir de bireýine adamzat qarsy tura almaıdy.
Kompıýterlik modeldeý kómegimen ǵalymdar asteroıd dıametriniń 1 shaqyrymynyń ózi ortasha Eýropa eliniń halqyn joıyp jiberetinin anyqtaǵan.
Odan bólek, bolý múmkin apattardyń alǵashqy úshtigine sıntetıkadan shyǵatyn óte qaýipti vırýstar engen. Odan keıin ǵalymdar saldary bárine belgili ıadrolyq soǵys bolady dep boljaýda. Al úshinshi orynda - mashınalar kóterilisine ákep soǵatyn jasandy ıntellekt qurastyrý tur.
