AstraZeneca vaktsınasynyń ataýy Vaxzevria bolyp ózgerdi
NUR-SULTAN. QazAqparat – Oksford ýnıversıtetimen birge koronavırýs vaktsınasyn jasaǵan brıtanııalyq-shvedtik AstraZeneca kompanııasy preparattyń ataýyn Vaxzevria dep ózgertti, dep habarlaıdy QazAqparat Shvetsııanyń dári-dármekter basqarmasynyń saıtyna silteme jasap.
Onyń aıtýynsha, vaktsına ataýynyń ózgerýi basqa ózgeristerge ákelmeıdi. Sonymen qatar mamandardyń bul ataý týraly bilýi kerektigin alǵa tartady, óıtkeni preparattyń qaptamasy men tańbalanýy túpnusqadan ózgeshe bolýy múmkin deıdi. Eýropalyq dárilik zattar agenttigi (EMA) 25 naýryzda AstraZeneca kompanııasy bergen tıisti ótinimdi qaraǵannan keıin vaktsınanyń jańa ataýyn maquldady.
«Vaxzevria – bul 18 jáne odan joǵary jastaǵy adamdarda SARS-CoV-2 vırýsy týdyratyn koronavırýs ınfektsııasynyń (COVID-19) aldyn alýǵa arnalǵan vaktsına», – delingen EMA habarlamasynda.
