AstraZeneca vaktsınasy Eýropa elderine jetkizildi

NUR-SULTAN. QazAqparat – Italııaǵa COVID-19-ǵa qarsy AstraZeneca farmatsevtıkalyq kompanııasynyń 250 myń dozaǵa jýyq vaktsınasy jetkizildi. El turǵyndary kelesi aptadan bastap ekpe alady dep josparlanyp otyr, dep habarlaıdy QazAqparat Euronews agenttigine silteme jasap.

Áýelde Italııa bıligi alǵashqy toqsanda túrli óndirýshiniń 28 mln doza vaktsınasyn alýdy kózdegen, biraq jetkizý kestesi úzilip, qańtarda tek 2 mıllıon vaktsınaǵa ǵana qol jetkizdi.

AstraZeneca vaktsınasynyń alǵashqy partııasyn senbi kúni Frantsııanyń medıtsına mekemeleri de alyp, alǵashqy ekpeler Lıon aýrýhanasynda jasaldy. 273 myń doza 65 jasqa deıingi medıtsına qyzmetkerlerine arnalǵan. Dárilik quraldar boıynsha eýropalyq agenttiktiń maquldaǵanyna qaramastan, Frantsııa ázirge bul ekpeni odan úlken adamdarǵa salmaý týraly sheshim qabyldady.

«Biz búgin AstraZeneca vaktsınasynyń 7 700 dozasyn aldyq jáne sony egýdi bastaımyz. Biz ekpe keshe keshke jetkizilgennen keıin vaktsınatsııa jasaýdy birinshi bolyp bastadyq. Búgin tústen keıin osy ortalyqta júz ekpe jasaý josparlanǵan», - dedi Lıon aýrýhanasynyń bas dárigeri Edýara Errıo Valerı Dıýran-Rosh.

AstraZeneca vaktsınasynyń 200 dozalyq alǵashqy partııasy Ispanııaǵa da jetkizildi. Bul elge Pfizer/BioNTech jáne Moderna-dan keıin ákelingen úshinshi preparat. Ispanııanyń densaýlyq saqtaý mınıstrligi AstraZeneca-ny 18-55 jas aralyǵyndaǵy azamattarǵa salý týraly sheshim qabyldady.

Eske salsaq, «AstraZeneca» - Eýropa dárilik zattar agenttigi maquldaǵan úshinshi vaktsına. Buǵan deıin EO amerıkalyq «Pfizer» jáne «Moderna» vaktsınalaryna ruqsat bergen edi.

Al brıtan-shved kompanııasynyń «AstraZeneca» vaktsınasynyń alǵashqy toby Nıderlandyǵa besinshi aqpanda jetti.