Astrahan oblysynda Ózbekstannyń 16 azamatyn quldyqta ustaǵandar sottaldy
ASTANA. Shildeniń 14-i. QazAqparat - Astrahan oblysynda Ózbekstannyń 16 azamatyn quldyqta ustap, olardy bir tilim nan úshin jumysqa jekken qaskúnemder toby sottaldy, dep habarlaıdy RBK.
Astrahan oblysynyń Narıman aýdandyq soty «Lastra» kásipornynyń dırektory Aleksandr Larındi, onyń uly Kırıll Larındi jáne fırma júrgizýshisi Haganı Ahýndovty qylmys jasaǵany úshin kináli dep taýyp, RF QK 127.2 babynyń 2 bólimi (qul eńbegin paıdalaný) boıynsha sottady.
RF Bas prokýratýrasynyń BAQ-pen jumys júrgizý basqarmasynyń habarlaýynsha, qylmystyq top 2009 jyly aýyl sharýashylyǵy ónimin óndiretin «Lastra» fırmasyna jumysqa ornalastyramyz degen ýájben Ózbekstannyń 16 azamatyn Astrahan oblysyna alyp kelgen.
Olardyń qujattaryn tartyp alyp, olardy jumysqa jekken, baǵynbaǵandaryn uryp-soǵyp, qashýǵa árekettengenderdi óltiremiz dep qorqytqan. Mıgranttar qoımalarda, al jyldyń jyly mezgilderinde Narıman aýdanynyń alqaptarynda jumys istegen.
Sot K.Larındi 3 jylǵa bas bostandyǵynan aıyrdy, H.Ahýndov - 2 jyl 6 aıǵa sottaldy. Jaza belgileý barysynda A.Larınniń egde jasy eskerile kele ony shartty túrde 4 jylǵa sottady.
