«Astrahan - Mańǵystaý» sý taratqyshynda apat bolyp, birneshe aýyl sýsyz qaldy
ATYRAÝ. QazAqparat - «Astrahan - Mańǵystaý» sý taratqyshyndaǵy apatqa baılanysty sol mańdaǵy eldimekenderge sý berý toqtatylǵan, dep habarlaıdy QazAqparat.
«Magıstraldy sý taratqysh» JShS bas dırektorynyń óndiris jónindegi orynbasary Asqar Qultýmıevtiń sózine sensek, avarııa Atyraý oblysynyń aýmaǵynda, Qulsary aýdany ortalyǵynan 20 shaqyrym jerde bolǵan. Oqıǵa ornynda 30 adam men 20 arnaıy tehnıka jumys istep jatyr.
Apattyń basty sebebi - sý qubyrlarynyń tozýy. Bul qubyr 1988 jyly salynǵan, sodan beri ábden eskirip, korrozııaǵa ushyraǵan. Eki metr sý taratqysh isten shyǵyp qalypty.
Osyǵan baılanysty Atyraý jáne Mańǵystaý oblysynyń jaqyn mańdaǵy birneshe eldimekeni ýaqytsha sýdan ajyratylǵan.
Eske sala keteıik, atalǵan sý taratqyshtyń jalpy uzyndyǵy - 2 myń shaqyrym. Reseıdiń Astrahan oblysymen shekaradaǵy Qıǵash ózeninen sý alynyp, osy taratqysh arqyly aýyldarǵa jetkiziletin.
