Astrahan aýdanynda dene shynyqtyrý jáne sport kesheni salynyp jatyr
KÓKShETAÝ. QazAqparat - Aqmola oblysynyń ákimi Málik Myrzalın jumys saparymen Egindikól jáne Astrahan aýdandarynda bolyp, birqatar aýyl sharýashylyǵy qurylymdarynyń egistik alqaptaryn aralap kórdi, dep habarlaıdy QazAqparat tilshisi əkimdiktiń baspasóz qyzmetine silteme jasap.
Osy kúnderi Egindikól aýdanyndaǵy «ASKOP» jaýapkershiligi shekteýli seriktestiginiń dıqandary dala tósindegi eńbek kórigin qyzdyryp, jumysty qarqyndy júrgizýde. Oblys ákimi aýdandarǵa jumys saparyn osy sharýashylyqtyń egistik alqaptaryn aralaýdan bastady.
Seriktestiktiń bas dırektory Nıkolaı Stepanenkonyń aıtýynsha, dıqandar táýligine bir myń gektardan astam alqapta egin bastyrýda. Seriktestiktiń oblystyń bes aýdanynyń aýmaǵynda barlyǵy 90 myń gektardan astam jeri bar. Barlyq egistik alqaptary boıynsha gektar berekesi 13,6 tsentnerden aınalýda. Sharýashylyq jyl saıyn 20 myńnan astam egistik jerlerin tyńaıtyp otyrady. Oǵan qosa, aramshóptermen kúresý úshin hımııalyq preparattardy qoldanyp keledi. Osyndaı qazirgi zamanǵy tehnologııa men agrotehnıkalyq sharalardyń arqasynda sharýashylyq dıqandary mol astyq jınaýdy mejelep otyr. Bul kompanııanyń quramyna Makınsk qalasyndaǵy syıymdylyǵy 150 myń tonna elevator da kiredi. Sonymen qatar, seriktestik mal sharýashylyǵymen de aınalysady.
«Biz eginshilikpen qatar, belsendi túrde mal ósirýmen aınalysamyz. 700 gektar jaıylymdyq jerimiz jáne asyl tuqymdy 250 bas iri qaramyz bar. Jaqynda Bashqurstannan Romanov tuqymdy 55 bas qoı aldyrttyq. Buǵan qosa, shoshqa da ósiremiz. Keler jyly et óńdeıtin kásiporyn ashý josparda bar», - deıdi Nıkolaı Stepanenko.
Sonymen qatar, oblys ákimi osy aýdandaǵy «Sarymsaqty» jáne «Ýrojaınoe» jaýapkershiligi shekteýli seriktestikteriniń egis alqaptaryn aralap, astyq jınaý naýqanynyń barysymen tanysty.
Al Egindikól aýylynda M.Myrzalın jańadan salynyp jatqan eki páterli turǵyn úılerdiń qurylys barysymen tanysty. Munda bes úı salynýda, barlyǵy - 10 páter. Búginde olardyń birinde kópbalaly otbasy turyp jatsa, qalǵandary jataqhana retinde bólinip otyr. Atalmysh úıler aldaǵy jeltoqsan aıynda tolyq paıdalanýǵa beriledi.
Budan keıin oblys ákiminiń sapary Astrahan aýdanynda jalǵasty. «Fermer-2002» seriktestiginiń egis alqaptary men «Shıshov E.I.» sharýa qojalyǵynyń kókónis qoımasyn aralap kórdi. Sharýa qojalyǵynyń basshysy Evgenıı Shıshovtyń aıtýynsha, bıylǵy jyly 250 tsentner kartop, 600 tsentner qyzylsha, 550-650 sábiz jáne 800 tsentner qyryqqabat jınalǵan. Ónimniń 60 paıyzy Astana qalasyna, qalǵan 40 paıyzy elimizdiń ońtústik óńirlerine jóneltiledi.
Aýdan ortalyǵynda áleýmettik nysandardyń qurylysy qarqyndy júrgizilýde. Sonyń biri 36 páterli turǵyn úı men dene shynyqtyrý jáne sport kesheniniń qurylysyn atap ótýge bolady. Sport keshenine bıýdjetten 220 mıllıon teńgeden astam qarjy bólinip otyr. Aýmaǵy 2000 sharshy metr nysanda sport alańy, fıtnes ortalyǵy, jattyǵý alańy jáne basseın qarastyrylǵan. Qurylys jumystary aǵymdaǵy jyldyń mamyr aıynda bastalǵan, olardy jyl sońynda aıaqtaý josparlanǵan. Qurylys alańynda bolǵan oblys ákimi aýdan basshysy men merdigerlerge jumysty shıratýdy tapsyrdy.
Sapar barysynda Málik Myrzalın Egindikól jáne Astrahan aýdandarynyń aktıvimen kezdesip, óńirlerdiń áleýmettik-ekonomıkalyq damýynyń 9 aıdaǵy qorytyndylaryn saralap, aldaǵy mindetterdi belgiledi. Kúzgi egin oraǵyn oıdaǵydaı aıaqtaý, bıýdjet kirisiniń oryndalýy jáne aýyl sharýashylyǵy maqsatyndaǵy jerlerdi tıimdi paıdalaný máseleleri qaraldy. Memlekettik kirister departamentiniń basshysy baıandaǵandaı salyq tólemeý jáne sýbsıdııany maqsatsyz paıdalanǵan jer paıdalanýshylarǵa qatysty qylmystyq is qozǵalyp otyr. Osy oraıda, aýdan ákimderiniń esepterin tyńdaǵan oblys ákimi bul máselelerdi sheshý úshin qatań shara qoldanylatynyn eskertti.
