Astrahan-Atyraý poıyzynda 25 jastaǵy kelinshek bosanyp qaldy
QR ІІM Kóliktegi polıtsııa departamentiniń baspasóz qyzmetinen málim etkenindeı, oqıǵa 28 mamyr kúni tańǵy saǵat 05.00-de Astrahan-Atyraý baǵytynda qatynaıtyn jolaýshylar poıyzynda boldy.
Jas kelinshektiń jeńildenýine jolseriktermen birge osy poıyzda patrýldik etip júrgen Atyraý qalasyndaǵy jelilik polıtsııa bóliminiń qyzmetkeri Asyljan Qamedenov járdemdesti.
A.Qamedenovtiń sózine qaraǵanda, vagonnyń jolserik áıelderi kóp oılanbastan, tolǵaq qysqan kelinshekti tez bosandyryp alý týraly sheshim qabyldaǵan. Ózi kólik polıtsııasynyń kezekshi bólimshesine habarlasyp, vokzal perronynda jedel járdem kóligin uıymdastyrý qajettigin jetkizgen.
Atyraý stantsııasyna kelgen kezde tártip saqshylary aman-esen bosanǵan ana men onyń qyzyn poıyzdan kóterip túsirip, jedel járdem brıgadasyna tapsyrdy.
«Atyraý stantsııasyndaǵy jelilik polıtsııa bóliminiń qyzmetkeri Asyljan Qamedenovtiń ózi kóp balaly otbasynda týyp-ósken. Bes ul, tórt qyz tárbıelengen shańyraqtan shyqqan aǵa serjanttyń ózi de – eki balanyń ákesi. Osyndaı oqıǵaǵa alǵash dýshar bolǵan ol asyp-saspaı, teorııalyq bilimin is júzinde paıdalana bildi. A.Qamedenov ishki ister organdarynda 2015 jyldan beri qyzmet etedi. Áriptesteri onyń árdaıym kómekke daıyn turatyn elgezek te jaýapkershiligi mol qyzmetker ekendigin aıtady. Departament basshylyǵy Asyljandy marapatqa usynýdy oılastyrýda», dep habarlady vedomstvodan.
Eske sala keteıik, budan buryn BQO-da zırat eskertkishterin qıratqan balalar bolyp shyqqanyn jazǵan bolatynbyz.
