Astrabus-qa endi qoldaý kórsetilmeıdi jáne ol jańartylmaıdy – CTS

NUR-SULTAN. QazAqparat - Paıdalanýshylar budan bylaı Astrabus qosymshasy arqyly astanalyq avtobýstardyń qozǵalysyn baqylaı almaıdy. Bul týraly «City Transportation Systems» JShS málim etti, dep habarlaıdy QazAqparat Nur-Sultan qalasy ákimdiginiń qalalyq monıtorıng jáne jedel áreket etý ortalyǵynyń Telegram-kanalyna silteme jasap.

«Astrabus qosymshasyna endi qoldaý kórsetilmeıdi jáne ol jańartylmaıdy. Bul qosymsha bizdiń kompanııaǵa emes, úshinshi tarap ázirleýshilerine tıesili ekenin atap ótemiz. Balama retinde Sizderge elordalyq avtobýstardyń baǵyttaryn qadaǵalaýǵa kómektesetin tıisti qosymshalardyń tizimin arnaıy tańdadyq: 2gis, Yandex. Kartalar. Olardyń kómegimen siz avtobýstardyń qozǵalysyn qadaǵalap, olardyń qozǵalys úlgisin qaraı alasyz, saparyńyz úshin jaqsy joldy taba alasyz.

Atap óteıik, bul qosymshalardyń barlyǵy da úshinshi tarap ázirleýshilerine tıesili. @cts_kz olardyń jumysy úshin jaýap bermeıdi. Osy tizimnen ózińizge yńǵaıly kez kelgen qosymshany telefonyńyzǵa júktep alyp, qalalyq qoǵamdyq kólik qozǵalysyn baqylańyz. Qosymshalardy Play Market jáne App Store dúkenderinen júktep alýǵa bolady», - delingen «City Transportation Systems» JShS habarlamasynda.