Astyqtyń tonnasynan 500 myń teńge tabys alý: Qostanaıda bıdaıdy tereńdetip óńdemek

ASTANA. KAZINFORM — Qostanaı oblysynyń ákimi Qumar Aqsaqalov astyqty tereń óńdeý boıynsha iske asyrylyp jatqan jobanyń áleýetine qatysty túsinik berdi.

Óńir ákimi ónimdi tereń óńdeýdi damytýǵa qatysty Memleket basshysy tıisti tapsarma bergenin eske saldy.

Bul turǵyda Q. Aqsaqalov astyq óńdeý jobasyna toqtaldy. Máselen, qazir astyqty shetelge satqan kezde, onyń quny tonnasy shamamen 90 000 teńgeni quraıdy.

— Al oblysta qurylysy bastalǵan zaýyttyń qýaty 415 000 tonnaǵa jetedi. Joba quny 70 mıllıard teńgeden asady. Bul zaýytta astyqty tereń óńdeý eskerilgen, — dedi oblys ákimi Ortalyq kommýnıkatsııalar qyzmetindegi baspasóz máslıhatynda.

Óńir basshysy qazirgi kezde astyqty óńdeý negizinen birinshi kezeńmen, ıaǵnı un óndirýmen shekteletinin aıtty.

— Bir tonna bıdaıdan orta eseppen 750 keli un alynady. Ókinishke qaraı, óńdeý protsesi osymen ǵana shektelip keledi, ıaǵnı eshkim ony tereńdetip óńdemeıdi. Bul rette, ony ári qaraı óńdeýge ekpin qoıyp otyrmyz. 750 keli unnan 450 keli krahmal jáne 70 keli glıýten alý kerek», — dep túsindirdi ákim.

Onyń sózine qaraǵanda, ári qaraı óńdeý arqyly 450 keli krahmaldan 110 keli bıoetanol jáne 70 keli lızın alýǵa bolady.

— Sondyqtan bir tonna astyqtan 250 kelige deıin eksportqa baǵyttalǵan jáne joǵary kiristi ónim alý múmkindigi bar. Atap aıtqanda, bıdaı kúıinde satsaq, tonnasy 90 000 teńgege ótedi. Biraq ony tereńdetip óńdesek, baǵasy 500 000 teńgege deıin kóteriledi, — dedi Qumar Aqsaqalov.

Budan buryn habarlanǵandaı, bıyl Qostanaı oblysynda 7 mln tonna astyq jınaldy.