Astyqtyń «sur ımporty»: memleketke 1,2 mlrd teńge zalal kelgen
ASTANA. KAZINFORM — Qarjylyq monıtorıng agenttiginiń Batys Qazaqstan oblysy boıynsha departamenti astyqtyń sur ımportyna qatysty shemanyń jolyn kesti.
Tergeý dereginshe, ımporttalǵan astyq keıin Qazaqstanda óndirilgen ónim retinde Ortalyq jáne Ońtústik Azııa elderine eksporttalǵan.
Tergeý málimetteri boıynsha, Qazaqstan aýmaǵy arqyly jalpy quny 11,2 mlrd teńge bolatyn shamamen 130 myń tonna astyq eksporttalǵan. Jetkizilimder Ózbekstanǵa, Aýǵanstanǵa jáne Tájikstanǵa júzege asyrylǵan. Shemany iske asyrý úshin aldyn ala jalǵan basshylardyń atyna kommertsııalyq uıymdar tirkelgen. Keıin bul kompanııalar men otandyq sharýa qojalyqtary arasynda astyq satyp alýǵa qatysty jalǵan sharttar rásimdelgen. Osylaısha astyqqa Qazaqstanda óndirilgen ónim túri berilip, ony tasymaldaý kezinde jeńildetilgen tarıf qoldanylǵan.
Atap aıtqanda, astyq eksportyna qatysty shemada «Bakery Nan», «KazGrano», «Perfect Seed», «Weizen» jáne «Golden Grain Kazakhstan» JShS-lary paıdalanylǵan. Tranzıttik tarıftiń tólenbeýi saldarynan «QTJ – Júk tasymaly» JShS-ne 1 mlrd teńgeden asa kóleminde zalal keltirilgen.
Sonymen qatar kúdiktiler salyq bereshegin májbúrlep óndirip alýdan jáne kredıtorlar aldyndaǵy mindettemelerin oryndaýdan jaltarý úshin ózderiniń baqylaýyndaǵy eksporttaýshy kompanııalardyń shottarynan úlestes uıymdardyń shottaryna aqsha aýdaryp, keıin bankrottyq týraly talap aryzdar bergen.
— Atalǵan áreketter memleket múddesine 1,2 mlrd teńge kóleminde zalal keltirgen. Іs boıynsha bes adam kúdikti dep tanyldy. Sotqa deıingi tergep-tekserý aıaqtaldy. Protseske qatysýshylar qylmystyq is materıaldarymen tanysýǵa kiristi. QR Qylmystyq-protsestik kodeksiniń 201-babyna sáıkes, tergeý múddesine qatysty ózge aqparat jarııa etilmeıdi, — dedi QMA resmı ókili Ernar Taıjan.
Buǵan deıin Qazaqstan astyǵynyń syrtqy naryqtarǵa tasymaly bıyl aıtarlyqtaı óskenin jazǵanbyz. Jyl basynan beri temirjolmen, 2 mıllıon tonna astyq eksporttalǵan.
