Astyqty tokenızatsııalaý jobasy Qostanaı oblysynda synaqtan ótkizilmek

ASTANA. KAZINFORM – Astyqty tokenızatsııalaý boıynsha pılottyq jobany Qostanaı oblysynda synaqtan ótkizý josparlanyp otyr. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstrliginiń birinshi vıtse-mınıstri Qanysh Tóleýshın aıtty.

- Álemdik tájirıbe kórsetkendeı, aýyl sharýashylyǵyn tsıfrlandyrý úlken artyqshylyqtar beredi. AQSh-ta avtonomdy jáne robotty egin jınaý júıeleri qoldanylady. Avtonomdy traktorlar úzilissiz jáne táýlik boıy jumys isteı alady. Kanadada geoanalıtıka jáne GPS navıgatsııalyq júıeleri qoldanylady. Bul marshrýttardy avtomattandyrý jáne ońtaılandyrý arqyly eńbek shyǵyndaryn 20-40 paıyz tómendetedi. IoT sensorlary aıaz, qurǵaqshylyq sııaqty qaýipter týraly aldyn ala habarlaýǵa múmkindik beredi, - dedi ol.

Onyń atap ótýinshe, Blockchain tehnologııasyn paıdalaný fermerlerdiń qarjylandyrýǵa ketetin ýaqyty men shyǵyndaryn azaıtady. Sonymen qatar alaıaqtyqtyń tómendeýine áser etedi. Osyǵan baılanysty elimizde agroónerkásiptik sektorda blokcheın tehnologııalaryn paıdalaný jumystary júrgizilip jatyr.

- Naqty taýarlardy tsıfrlyq tokendarǵa aınaldyrý josparlanyp otyr, ıaǵnı – tokenızatsııa. Astyq tokenızatsııasy - naqty astyqty blokcheındegi tsıfrlyq tokenǵa aýdarý. Tehnologııa astyqty esep aıyrysý jáne saýda, nesıe alý, táýekelderdi saqtandyrý úshin paıdalanýǵa bolatyn tolyqqandy qarjy quralyna aınaldyrady. Astyqty tokenızatsııalaý boıynsha pılottyq jobany Qostanaı oblysynda synaqtan ótkizý úshin iske qosý josparlanyp otyr. Pılot sátti ótken jaǵdaıda salalyq memlekettik organmen birlesip, jobany el boıynsha masshtabtaýdy pysyqtaý kóózdelgen, - dedi Qanysh Tóleýshın.

Aıta keteıik, bıyl boljam boıynsha 24 mln tonna astyq bastyrylady.

Osy rette Premer-mınıstr astyqty egis alqabynan tıisti jerine deıin jetkizýdi joǵary deńgeıde uıymdastyrýdy tapsyrdy.