Astyqty tereń óńdeıtin 6 joba iske asady

ASTANA. KAZINFORM – Bıyl 9 aıda aýyl sharýashylyǵynyń negizgi kapıtalyna salynǵan ınvestıtsııalar kólemi 1,4 trln teńgege jetti. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

Qazaqstanda 2029 jylǵa deıin astyq óńdeýdiń alty iri jobasy iske asady
Foto: Úkimet

- Aýyl sharýashylyǵy ónimderin qaıta óńdeý kólemi de artyp keledi. Bıyl on aıda ósimdik maıynyń óndirisi 24,1%-ǵa ósip, 938 myń tonnany, un óndirisi 10,8%-ǵa ósip, 3,2 mln tonnany, kondıterlik ónimder óndirisi 7,1%-ǵa ósip, 210 myń tonnany qurady. Agroónerkásiptik keshenniń qaıta óńdelgen ónimderiniń eksporty da artty. Qańtar–tamyz aılarynda onyń kólemi 35,1%-ǵa ulǵaıyp, 3 mlrd AQSh dollaryna jetti. 2023 jylmen salystyrǵanda ósimdik maıynyń eksporty 40%-ǵa ósip, 705 myń tonnany, un eksporty 30%-ǵa ósip, 1,38 mln tonnany, kondıterlik ónimder eksporty 17%-ǵa ósip, 51,1 myń tonnany qurady, - dedi mınıstr.

Aıdarbek Saparovtyń sózine qaraǵanda, salanyń keńeıýimen qatar ınvestıtsııa kólemi de ulǵaıyp keledi. Bıylǵy toǵyz aıda tamaq ónimderin óndirý salasynyń negizgi kapıtalyna salynǵan ınvestıtsııalar 2,1 ese ósip, 373 mıllıard teńgege jetti.

- Memleket basshysynyń tapsyrmasy boıynsha aýyl sharýashylyǵy ónimderin tereń óńdeýdi damytýǵa erekshe nazar aýdarylyp otyr. Osy baǵytta 2029 jylǵa deıin jylyna jalpy kólemi 5,8 mln tonnaǵa deıin astyq shıkizatyn óńdeıtin alty iri jobany iske asyrý kózdelgen. Alǵashqy nátıjeler bar. Bıyl Túrkistan oblysynda «Qazkrahmal» zaýyty, Jambyl oblysynda «Fýfeng Grýpp» kompanııasynyń jobasy iske qosyldy. «Qazkrahmal» zaýytynda júgeriden modıfıkatsııalanǵan krahmal men glıýkoza-frýktoza shárbattaryn óndirý kózdelgen. «Fýfeng» jobasy aıasynda krahmal, amınqyshqyldary (lızın, treonın, glýtamın qyshqyly, glýtamın, leıtsın), jemshóp, júgeri aqýyzy men júgeri dániniń uryǵyn qamtıtyn ónim túrlerin shyǵarý josparlanǵan. Bul ónimderge álemdik naryqta suranys ósip keledi, - dedi ol.

Mınıstrdiń dereginshe, 2029 jylǵa deıin taǵy tórt jobany iske qosý josparlanǵan. Onyń ekeýi Aqmola oblysynda, bireýi Qostanaı oblysynda jáne bireýi Astana qalasynda ornalasady. Bul jobalardy iske asyrý – qosylǵan quny joǵary ónimder óndirisin ulǵaıtýǵa, otandyq astyqqa suranysty qamtamasyz etýge múmkindik beredi. 

- Osy jyldyń 9 aıynda aýyl sharýashylyǵynyń negizgi kapıtalyna salynǵan ınvestıtsııalar kólemi 1,4 trln teńgeni qurady. Bul 2025 jyldyń sáıkes kezeńimen salystyrǵanda 1,4 ese kóp. Búgingi tańda otandyq jáne sheteldik ınvestorlarmen jalpy somasy 2,4 trln teńgeni quraıtyn ınvestıtsııalar týraly 13 kelisim jasaldy. Investorlar qatarynda Fýfeng Grýp, Mars, Koka-kola, Karlsberg, Tırııakı Holdıng, Shınlaın jáne basqa da kompanııalar bar. Bul jobalardy iske asyrý otandyq aýyl sharýashylyǵy shıkizatyna suranysty arttyrýǵa, qosylǵan quny joǵary ónim óndirisin keńeıtýge jáne óńirlerde jumys oryndaryn ashýǵa múmkindik beredi, - dedi mınıstr.