Astyqty egis alqabynan tıisti jerine deıin jetkizýdi joǵary deńgeıde uıymdastyrý qajet - Bektenov

ASTANA. KAZINFORM – Astyqty egis alqabynan tıisti jerine deıin jetkizýdi joǵary deńgeıde uıymdastyrý qajet. Bul týraly Úkimet otyrysynda Premer-mınıstr Oljas Bektenov aıtty.

- Kólik jelisiniń qoljetimdi bolýyn erekshe baqylaýǵa alý kerek. Astyqty egis alqabynan tıisti jerine deıin jetkizýdi joǵary deńgeıde uıymdastyrý qajet. Qajetti kólemde vagondar parkin jumyldyrýdy tapsyramyn. Logıstıkada eshqandaı irkilis bolmaýǵa tıis. Otandyq ónimdi ótkizý máselesinde de júıeli tásil qajet. Basty mindet – ishki jáne syrtqy naryqtarda básekege qabiletti ónim shyǵarý. Ol úshin jetkizý tizbeginde otandyq óndirýshilerge qoldaý kórsetýimiz kerek, - dedi Oljas Bektenov. 

Úkimet basshysy júrgizilip jatqan jumystyń barynsha shynaıylyǵy men ashyqtyǵyn qamtamasyz etý mańyzdy ekenin basa aıtty.

- Osy rette klımattyq táýekelderdi boljaý, ónimdilik kólemin esepteý jáne naryqtyq baǵalardy baqylaý kezinde tsıfrlyq sheshimderdi qoldanýdy keńeıtý qajet. Sondaı-aq, jasandy ıntellektti qoldaný ónimdi jınaý, saqtaý jáne tehnıkany basqarý protsesterin ońtaılandyrýǵa baǵyttalýy kerek. Jalpy, tsıfrlandyrý azyq-túlik qorlaryn dál jáne ýaqtyly esepke alýdy qamtamasyz etýi tıis, - dedi ol.

Aıta keteıik, bıyl boljam boıynsha 24 mln tonna astyq bastyrylady.