Astyqtan krahmal, glıýten, bıoetanol alynatyn 6 joba qolǵa alyndy
ASTANA. KAZINFORM – 2029 jylǵa deıin astyqty tereń óńdeıtin 6 iri jobany iske asyrý josparlanyp otyr. Olardyń jalpy qýaty jylyna 5,8 mln tonna shıkizatty óńdeýge jetedi. Bul týraly Úkimet otyrysynda Aýyl sharýashylyǵy mınıstri Aıdarbek Saparov málimdedi.
Mınıstrdiń aıtýynsha, qazir elimizde jylyna 510 myń tonna astyq óńdeıtin úsh kásiporyn jumys isteıdi.
– 2029 jylǵa deıin krahmal, glıýten, bıoetanol, amınqyshqyldary jáne basqa da ónimder shyǵaratyn, jylyna 5,8 mln tonna shıkizat óńdeıtin alty iri jobany iske asyrý josparlanyp otyr. Alǵashqy nátıjeler qazirdiń ózinde bar, – dedi A.Saparov.
Atap aıtqanda, Túrkistan oblysynda «Kazkrahmal» zaýyty, al Jambyl oblysynda Fufeng Group kompanııasynyń óndiristik jobasy iske qosyldy.
Jańa óndiristerdi qurýmen qatar, olardy shıkizatpen qamtamasyz etý, ınfraqurylymdy damytý jáne jobalyq qýattarǵa shyǵarý boıynsha da keshendi jumys júrgizilip jatyr.
– Soltústik Qazaqstan oblysynyń tájirıbesin taratý aıasynda zamanaýı taýarlyq sút fermalaryn salý jalǵasyp jatyr. Bıyl jyl sońyna deıin iske qosylǵan fermalardyń jobalyq qýatynyń 70%-yna, keler jyly tolyq qýatyna shyǵarý josparlanǵan. Keler jylǵa jalpy qýaty 228 myń tonna sút óndiretin 21 taýarlyq sút fermasynan turatyn jobalar pýly jasaldy, – dep tolyqtyrdy mınıstr.
Et óndirisin ulǵaıtý úshin tolyq óndiristik tsıkli bar 6 et klasteri iske qosylmaq. Túrkistan oblysynda alǵashqy iri mamandandyrylǵan mal bırjasy salynyp jatyr.
Buǵan deıin Aýyl sharýashylyǵy mınıstri sharýalardy qoldaýǵa júzdegen mlrd qarajat bólinetinin aıtqan edi.
Prezıdent Qasym-Jomart Toqaev Joldaýda aýyl sharýashylyǵy ınfraqurylymyn jetildirý, ónimdi tereń óńdeý jáne eńbek ónimdiligin arttyrý máselelerin kóterdi.
