Astyq sharýashylyǵy ǵylymı-óndiristik ortalyǵynda organıkalyq ónim óndirý tsehy ashylady
ASTANA. KAZINFORM — A. I. Baraev atyndaǵy Astyq sharýashylyǵy ǵylymı-óndiristik ortalyǵynda organıkalyq ónim óndiretin tsehty iske qosýǵa daıyndyq jumystary jaqyn ýaqytta aıaqtalady, dep habarlaıdy AShM baspasóz qyzmeti.
Aýyl sharýashylyǵy mınıstrligi organıkalyq eginshilikti damytý jáne aýyl sharýashylyǵy ónimderin tereń óńdeý jumystaryn jalǵastyrady.
Onda ósimdikterdi qorǵaýdyń hımııalyq quraldaryn, pestıtsıdter men ózge de agrohımıkattardy qoldanbaı ósirilgen dándi daqyldar negizinde organıkalyq ónimder túrin keńeıtý josparlanyp otyr. Joba otandyq ekologııalyq taza ónimder túrlerin ulǵaıtýǵa jáne aýyl sharýashylyǵy shıkizatynyń qosylǵan qunyn arttyrýǵa baǵyttalǵan.
— Óndiristiń shıkizattyq bazasyn Ortalyqtyń tájirıbelik alqaptary qamtamasyz etedi. Munda organıkalyq eginshilik qaǵıdattaryna sáıkes dándi, maıly jáne burshaq tuqymdas daqyldar ósiriledi. Jobany júzege asyrý barysynda aýyl sharýashylyǵy daqyldaryn ósirý tehnologııalaryn jetildirýge jáne óndiris tıimdiligin arttyrýǵa arnalǵan Ortalyq ǵalymdarynyń ǵylymı zertteý nátıjeleri qoldanylady, — delingen habarlamada.
Joba aıasynda tsıfrlyq sheshimder men óndiristik protsesterdi avtomattandyrýǵa erekshe nazar aýdarylǵan. Zamanaýı tehnologııalar egis alqaptarynyń jaǵdaıyn naqty ýaqyt rejıminde baqylaýǵa, topyraq kórsetkishterin qadaǵalaýǵa, aýa raıy jaǵdaılaryn taldaýǵa jáne óndiris tıimdiligin arttyrý úshin jedel sheshimder qabyldaýǵa múmkindik beredi.
Vedomstvo atap ótkendeı, jańa tsehtyń iske qosylýy elimizdiń agroónerkásiptik kesheninde organıkalyq óndiristi damytý, aýyl sharýashylyǵy ónimderin tereń óńdeý múmkindigin arttyrý jáne ınnovatsııalyq tehnologııalardy engizý jónindegi mindetterdi júzege asyrýdaǵy kezekti mańyzdy qadam bolmaq.
Buǵan deıin Qazaqstan Estonııanyń bıotehnologııa, organıkalyq eginshilik tájirıbesine qyzyǵýshylyq tanytqanyn jazǵanbyz.
