Astyq saqtaý qoımalary egin jınaý maýsymyna qanshalyqty daıyn

ASTANA. KAZINFORM – Aýyl sharýashylyǵy mınıstrligi bıylǵy egin jınaý maýsymyna astyq saqtaý qoımalarynyń qanshalyqty daıyn ekenin málimdedi.

— Oblystardyń ákimdikteri usynǵan málimetterge sáıkes, elimizdegi astyq saqtaý qoımalarynyń jalpy syıymdylyǵy - 30,9 mln tonna. Onyń ishinde jumys istep turǵan lıtsenzııalanǵan astyq qabyldaý kásiporyndarynda – 13,5 mln tonna, aýyl sharýashylyǵy taýar óndirýshileriniń qoımalarynda – 17,4 mln tonna astyqqa oryn bar. Bul saqtaý syıymdylyǵy ótken jyldardaǵy qaldyqtardy eskere otyryp, alynǵan ónimdi saqtaýǵa jetkilikti, - dep málimdegen mınıstrlik Kazinform agenttiginiń resmı saýalyna joldaǵan jaýabynda.

Qoldau.kz portalynyń derekteri boıynsha, qazirgi tańda lıtsenzııalanǵan astyq qoımalarynyń júktemesi – 3,1 mln tonna (22%), al bos oryn – 10,2 mln tonna. Onyń ishinde negizgi astyq egetin óńirler boıynsha:

• Qostanaı oblysynda júkteme – 590,9 myń tonna (19%), bos syıymdylyq – 2,4 mln tonna;
• Soltústik Qazaqstan oblysynda júkteme – 932,5 myń tonna (27%), bos syıymdylyq – 2,4 mln tonna;
• Aqmola oblysynda – 1,2 mln tonna (26%), bos syıymdylyq – 3,3 mln tonna.

— Elevatorlar men astyq qoımalarynda oryn jetispeýshiligi joq. Qolda bar saqtaý qýattary ónimdi saqtaý úshin jetkilikti, - delingen AShM habarlamasynda.

Eske sala keteıik, byltyr elimizde 26,7 mln tonna astyq jınaldy. Bul – keıingi 10 jyldaǵy rekordtyq kórsetkish.