Astyq pen un eksportynyń kólemi ótken jylǵydan 13 paıyzǵa kóp
ASTANA. KAZINFORM - «Qazaqstan temir joly» AQ derekterine sáıkes, 2025 jylǵy qyrkúıekten 2026 jylǵy sáýirge deıingi marketıngtik jyldyń basynan beri Qazaqstan 11,1 mln tonna astyq jáne astyq balamasyndaǵy un eksporttady. Bul ótken jyldyń sáıkes kezeńimen salystyrǵanda (9,8 mln tonna) 13%-ǵa artyq.
QR Aýyl sharýashylyǵy mınıstrligi baspasóz qyzmetiniń habarlaýynsha, eksport kóleminiń ósýi dástúrli ótkizý naryqtaryndaǵy aýyl sharýashylyǵy ónimderine degen turaqty suranysqa, sondaı-aq tıimdi logıstıka men salany memlekettik qoldaý sharalaryna baılanysty.
Negizgi baǵyttar boıynsha jetkizilimderdiń aıtarlyqtaı ósýi baıqalady.
Atap aıtqanda, Ózbekstanǵa astyq eksporty 13,8%-ǵa ósip, 8,2 mln tonnadan 9,3 mln tonnaǵa jetti. Qyrǵyzstanǵa eksport 1,6 esege artyp, 278 myń tonnadan 440 myń tonnaǵa deıin ulǵaıdy. Aýǵanstanǵa jetkizilimder 51%-ǵa ósip, 1,2 mln tonnadan 1,8 mln tonnaǵa jetti. Túrikmenstanǵa eksport 1,5 esege artyp, 123 myń tonnadan 183 myń tonnaǵa deıin kóbeıdi.
- Oń dınamıka qazaqstandyq astyqtyń syrtqy naryqtardaǵy joǵary básekege qabilettiligin jáne eldiń óńirdegi aýyl sharýashylyǵy ónimderiniń jetekshi eksporttaýshylarynyń biri retindegi pozıtsııasynyń nyǵaıýyn kórsetedi, - delingen habarlamada.
Jetkizilim geografııasyn keńeıtý, kólik-logıstıkalyq ınfraqurylymdy damytý jáne ónimniń qosylǵan qunyn arttyrý boıynsha jumystar júrip jatyr.
Osyǵan deıin Qazaqstannyń Grýzııaǵa eksport kólemin arttyratyny týraly jazdyq.
