Astyq óndirýshiler men eksporttaýshylardy memlekettik qoldaý sharalary uzartyldy

ASTANA. KAZINFORM – Aýyl sharýashylyǵy mınıstrligi a

styq óndirýshiler men eksporttaýshylarǵa memlekettik qoldaý sharalary 2026 jyldyń qyrkúıek aıyna deıin uzartylǵanyn habarlady.

Астық - 2025
Фото: Мақсат Шағырбаев/ Kazinform/ freepik.com

Astyqty tasymaldaýǵa baılanysty shyǵyndardy arzandatýǵa baǵyttalǵan sýbsıdııa tóleý qaǵıdalarynyń, sondaı-aq agroónerkásip salasynda qyzmet atqaratyn ulttyq kompanııa shyǵyndaryn sýbsıdııalaý qaǵıdalarynyń qoldanylý merzimi 2026 jylǵy 1 qyrkúıekke deıin uzartyldy.

Memlekettik qoldaý sharalarynyń basty maqsaty – astyq sektoryndaǵy logıstıkanyń tıimdiligin arttyrý, naryq qatysýshylarynyń qarjylyq júktemesin azaıtý jáne otandyq aýyl sharýashylyǵy ónimderiniń eksportyn yntalandyrý.

Jartylaı sýbsıdııalaý tómendegi tranzıttik baǵyttar boıynsha júzege asyrylady.

Atap aıtqanda:

- Reseı Federatsııasy aýmaǵy arqyly Azov, Qara jáne Baltyq teńizderiniń porttaryna;

- Reseı Federatsııasy, Latvııa Respýblıkasy, Lıtva Respýblıkasy jáne Estonııa Respýblıkasy aýmaǵy arqyly Baltyq teńiziniń porttaryna;

- Reseı Federatsııasy aýmaǵy arqyly Latvııa, Lıtva jáne Estonııa respýblıkalaryna;

- Ázerbaıjan Respýblıkasy men Grýzııa aýmaǵy arqyly Qara teńiz porttaryna;

- Túrikmenstan aýmaǵy arqyly Aýǵanstan Islam Emıratyna;

- Túrikmenstan aýmaǵy arqyly Iran Islam Respýblıkasyna;

- Qytaı Halyq Respýblıkasy aýmaǵy arqyly Ońtústik-Shyǵys Azııa elderine;

- Reseı Federatsııasy aýmaǵy arqyly Grýzııa men Armenııany qamtıdy.

Osy oraıda eksporttyq baǵytqa baılanysty ótemaqy kólemi bir tonna astyq úshin 20-30 myń teńge aralyǵynda ózgerip turady. Osy jyly 15 qyrkúıektegi jaǵdaı boıynsha, baǵdarlamanyń operatory – «Azyq-túlik kelisimshart korporatsııasy» UQ» AQ astyq óndirýshiler men eksporttaýshylarǵa 828,4 myń tonna bıdaı tasymaly úshin 19,1 mlrd teńge aýdardy. Korporatsııaǵa barlyǵy 553 ótinim kelip túsken.

Bıdaı eksportynyń jalpy kólemi 1,2 mln tonnaǵa jetip, 28,2 mlrd teńge kóleminde júzege asyryldy. Onyń ishinde qazaqstandyq astyq jóneltilimderiniń kóp úlesi Ázerbaıjanǵa – 43% jáne Baltyq elderine – 30% tıesili boldy. Eksporttyń taǵy 16%-y Baltyq jáne Qara teńiz porttaryna tranzıtpen jetkizildi. Aýǵanstan men Grýzııanyń úlesi tıisinshe 6% jáne 5% boldy.

Aýyl sharýashylyǵy jylynda 2024–2025 arnalǵan eksportty sýbsıdııalaý baǵdarlamasy bıdaı jetkizilimderiniń artýyna ǵana áser etip qoımaı, qazaqstandyq astyqtyń álemdik naryqtarda moıyndalýyna da zor yqpal etti. Máselen, osy jyldyń segiz aıynyń qorytyndysy boıynsha Qazaqstan shamamen 12,8 mln tonna astyq eksporttap, dástúrli baǵyttardaǵy (Ortalyq Azııa elderi men Kaspıı óńiri) ustanymdaryn saqtaýmen qatar, jańa ótkizý arnalaryna da shyqty.

Atap aıtqanda, alǵash ret Qazaqstan bıdaıynyń satyp alýshylary qataryna Marokko, Aljır, Mavrıtanııa, BAÁ, Vetnam, sondaı-aq birqatar eýropalyq el – Belgııa, Polsha, Portýgalııa, Norvegııa, Ulybrıtanııa, Shotlandııa kirdi.

Buǵan deıin sheteldik ımporttaýshylar Qazaqstandy negizinen qatty (dýrým) jáne joǵary aqýyzdy (hi-pro) bıdaı jetkizýshisi retinde tanysa, endi olar elimizdiń jumsaq bıdaıynyń sapasyn da moıyndaı bastady. Sonyń nátıjesinde eksporttalatyn ónim túrleri kóbeıdi, al qazaqstandyq astyqtyń álemdik naryqta básekege qabilettiligi aıtarlyqtaı arta tústi. Memlekettik qoldaý sharalarynyń 2026 jylǵy 1 qyrkúıekke deıin uzartylýy astyq jóneltilimderiniń qarqynyn saqtaýǵa, sondaı-aq ótken maýsymda ashylǵan bolashaǵy zor eksporttyq naryqtarda qazaqstandyq bıdaıdyń ornyn nyǵaıtýǵa baǵyttalǵan.

Aıta keteıik, Qytaı Qazaqstan unyn kóptep satyp ala bastady.

Сейчас читают