Astyq naryǵyndaǵy «sur ımport» 2024 jylǵy egis naýqanyna qaýip tóndiredi

Astyq naryǵyndaǵy Reseıden keletin «sur ımport» 2024 jylǵy egis naýqanyna qaýip tóndiredi. Bul jaıynda Aýyl sharýashylyǵy mınıstrliginen málim etti, dep habarlaıdy Kazinform.

«Sońǵy birneshe jylda qazaqstandyq astyq naryǵy «sur ımporttyń» zańsyz ákelinýinen zardap shekti. Bul qazaqstandyq fermerlerdiń qarjylyq jaǵdaıyna keri áserin tıgizdi. Kredıtorlar aldyndaǵy mindettemelerdi ýaqtyly oryndamaý jáne jalpy alǵanda 2024 jylǵy egis naýqanyna qaýip tóndiredi. Tómen dempıngtik baǵamen ımporttalatyn reseılik bıdaıdyń aıtarlyqtaı kólemi ishki naryqqa birshama qysym jasady. Sonyń saldarynan bıdaıymyz suranyssyz qalyp otyr», - delingen mınıstrliktiń agenttiktiń resmı saýalyna bergen jaýabynda.

Vedomstvonyń atap ótýinshe, bıdaı ımportynyń «sur shemasy» men onyń reeksportynyń negizgi tetigi - Reseı Federatsııasynyń shekaralas óńirlerinen avtomobıl jáne temirjol kóligi arqyly zańsyz ákelý.

«Osyǵan oraı, Aýyl sharýashylyǵy mınıstriniń 2023 jylǵy 10 sáýirdegi buıryǵymen bıdaıdy avtomobıl kóligimen ákelýge tyıym salyndy. Sonymen qatar, bıdaıdyń reeksportyna baqylaýdy odan ári kúsheıtý úshin Aýyl sharýashylyǵy mınıstriniń 2023 jylǵy 25 qyrkúıektegi № 337 buıryǵymen bıdaıdy avtomobıl kóligimen ákelýge tyıym salý uzartylyp, shekteýler engizildi. Temirjol arqyly bıdaı ımporty da engizildi. Bul rette astyq óńdeýshi kásiporyndarǵa, qus sharýashylyǵy kásiporyndaryna, sondaı-aq lıtsenzııalanǵan elevatorlarǵa temir jol kóligimen ımporttaý shektelmeıdi», - dedi mınıstrlikten.