Astyq keptirý tarıfteriniń negizsiz ósýine jol bermeý qajet — AShM
ASTANA. KAZINFORM — Búgin Úkimet otyrysynda Aýyl sharýashylyǵy vıtse-mınıstri Azat Sultanov Premer-mınıstr Oljas Bektenovten egin jınaý jumystaryn ýaqytyly aıaqtaý jáne jınalǵan ónimniń saqtalýyn qamtamasyz etý maqsatynda ákimdikterge birqatar tapsyrma berýdi ótindi.
Onyń aıtýynsha, ákimdikter egin jınaý barysyn kúndelikti baqylaýda ustap, jumystardyń qarqyny men jınalǵan alqaptardyń kólemin jedel qadaǵalaýy qajet. Sondaı-aq fermerler men áleýmettik-kásipkerlik korporatsııalardyń Agrarlyq kredıttik korporatsııa aldyndaǵy mindettemelerin tıisinshe oryndaýy tıis. Bul kelesi agrarlyq maýsymda sharýalardyń nesıe alý múmkindigin saqtaýǵa múmkindik beredi.
Jappaı egin jınaý kezeńinde elevatorlardyń úzdiksiz jumysyn jáne astyq keptirý agregattarynyń tolyq daıyndyǵyn qamtamasyz etýge de basymdyq berilmek.
— Avtokólikterdiń kezekke turýyna jáne kidiristerge, sondaı-aq astyq keptirý tarıfteriniń negizsiz ósýine jol bermeý qajet, — dedi Azat Sultanov.
Sonymen qatar ákimdikter 2027 jylǵy ónimge qajetti aýyl sharýashylyǵy daqyldarynyń sapaly tuqym qoryn qalyptastyrý kerek. Ol úshin tuqymdy ýaqytyly daıyndaý, tazalaý, suryptaý jáne belgilengen kondıtsııaǵa jetkizý jumystaryn uıymdastyrý, sondaı-aq tuqym sapasyn mindetti túrde tekserý qajet.
— Jalpy, egin jınaý máselesi turaqty baqylaýda. Barlyq másele jedel shtab otyrystarynda qaralyp, tıisti sheshimder qabyldanyp jatyr, — dedi vıtse-mınıstr.
Buǵan deıin bıyl qýańshylyqqa qaramastan astyq túsimi kópjyldyq ortasha kórsetkishten joǵary bolatynyn jazǵan edik.
