Astyq eksporttaýshylaryna 2,8 mlrd teńge kóleminde kólik shyǵyny óteldi
ASTANA. KAZINFORM – Azyq-túlik kelisimshart korporatsııasy bıdaıdy alys shetel naryqtaryna jetkizetin aýyl sharýashylyǵy óndirýshileri men eksporttaýshylarǵa tólemderdi jalǵastyryp jatyr.
2025 jylǵy 10 maýsymdaǵy jaǵdaı boıynsha kólik shyǵyndaryn óteýge 345 ótinim tústi. Eksporttyq jetkizilimderdiń jalpy kólemi 16,8 mlrd teńge somasyna 740,7 myń tonna bıdaı. Eksporttyń negizgi baǵyttary: Ázirbaıjan — 329,3 myń tonna, Baltyq elderi — 224,5 myń tonna, Grýzııa — 41 myń tonna jáne Qara teńiz ben Baltyq teńiziniń porttary arqyly tranzıttik marshrýttar — 108,3 myń tonna.
— Aýyl sharýashylyǵy mınıstrligi bekitken Astyq tasymaldaýǵa baılanysty shyǵyndardyń qunyn arzandatýǵa sýbsıdııalar tóleý qaǵıdalaryna sáıkes Azyq-túlik kelisimshart korporatsııasy eksporttaýshylarǵa 121,7 myń tonna bıdaı jetkizgeni úshin 2,8 mlrd teńgeden astam tóledi. Atap aıtqanda, jetkizýshilerge Ázirbaıjanǵa astyq jóneltýge 1,1 mlrd teńge, Baltyq elderine — 1,2 mlrd teńge, Aýǵanstanǵa — 223,2 mln teńge, Grýzııaǵa — 21 mln teńge, Qara teńiz baǵytynda — 170,2 mln teńge kóleminde qarajat aýdaryldy. Tólemder jetkizý kólemi rastalýyna jáne sýbsıdııalaý sharttarynyń sáıkestigine qaraı kezeń-kezeńmen júrgiziledi, — delingen habarlamada.
Esterińizge sala keteıik, Azov, Qara jáne Baltyq teńizderiniń porttaryna, Latvııa, Lıtva, Estonııaǵa tranzıttik marshrýttar boıynsha bıdaıdy tasymaldaǵany úshin ishinara ótemaqy beriledi. Sondaı-aq, astyqty Qytaı arqyly Ońtústik-Shyǵys Azııa elderi baǵytynda tranzıtpen jóneltetin jetkizýshiler úshin memlekettik qoldaý kózdelgen.
Ótemaqy mólsheri eksport baǵytyna baılanysty bir tonna astyq úshin 20-dan 30 myń teńge.
Sýbsıdııalardy tóleý qaǵıdalary 2025 jylǵy 1 qańtardan bastap júrgizilgen tasymaldarǵa qoldanylady.
Aǵymdaǵy naryqtyq jaǵdaıdy eskere otyryp, Azyq-túlik kelisimshart korporatsııasy eksport geografııasyn keńeıtýge, onyń ishinde Baltyq porttary arqyly jańa halyqaralyq saýda oryndaryna shyǵýǵa jáne joǵalǵan naryqtarda pozıtsııalardy qalpyna keltirýge erekshe nazar aýdarady.
Aıta ketelik bıyl 23,7 mln gektar jerge aýyl sharýashylyǵy daqyldary egildi.