Astyq eksportynyń jańa naryǵyn keńeıtý kerek – Premer-mınıstr

ASTANA. KAZINFORM – Úkimet otyrysynda Premer-mınıstr Oljas Bektenov qosylǵan quny joǵary aýylsharýashylyq ónimderdiń eksportyn arttyrýdyń mańyzyna toqtaldy.

- Saýda jáne Aýyl sharýashylyǵy mınıstrlikteri jınalǵan ónimdi tıimdi ótkizý, onyń ishinde dástúrli naryqtarmen qatar, jańa sheteldik naryqtarǵa da eksport kólemin ulǵaıtý úshin tıisti sharalar qabyldaýy kerek. Bul rette tereń óńdelgen ónimderge basa mán bergen jón. Qazir elimizde osyndaı iri jobalar júzege asyrylyp jatyr. Olardyń qatarynda Jambyl, Túrkistan oblystaryndaǵy júgeri óńdeý, Astana qalasyndaǵy krahmal óndirisi, sondaı-aq Soltústik Qazaqstan, Qostanaı jáne Aqmola oblystaryndaǵy lızın, glıýten jáne bıoetanol shyǵaratyn jobalardy atap ótýge bolady, - dedi Úkimet basshysy.

Oljas Bektenovtiń sózinshe, bul jobalarmen shektelip qalýǵa bolmaıdy.

- Salany keshendi damytý úshin olardyń sanyn kóbeıtý qajet. Osyǵan uqsas jobalarǵa ınvestıtsııalar tartýǵa basa kóńil bólinýge tıis. Dástúrli astyq eksportynan joǵary qosylǵan quny bar tereń óńdelgen ónimderdi shyǵarýǵa kóshken jón. Jalpy azyq-túlik taýarlarynyń jetkilikti qoryn qalyptastyrý qajet. Óńir ákimdikteri turaqtandyrý qorlaryndaǵy jaǵdaıǵa únemi monıtorıng júrgizip, negizgi kókónis ónimderin qajetti kólemde jetkizý boıynsha sharttardyń ýaqytyly jasalýyn qamtamasyz etsin, - dedi Premer-mınıstr.

Aıta keteıik, Qazaqstan bıyl 16 mln gektar alqaptan 27,1 mln tonna astyq aldy.