Astyq eksporty keıingi 20 jyldaǵy eń joǵary kórsetkishke jetti – alqa otyrysy

ASTANA. KAZINFORM – QR Aýyl sharýashylyǵy mınıstrliginiń alqa otyrysynda osyndaı málimetter keltirildi, dep habarlaıdy vedomstvonyń baspasóz qyzmeti.

Bapasóz málisetterine qaraǵanda, otyrysta aýyl sharýashylyǵy vıtse-mınıstri Azat Sultanov jyldyń qorytyndysy boıynsha aýyl sharýashylyǵy jalpy óniminiń kólemi artqanyn habarlady. Ósimdik sharýashylyǵynda óndiris 7,8%-ǵa, mal sharýashylyǵynda 3,3%-ǵa ósken.

Ortasha ónimdilik 16,3 ts/ga qurady, taza salmaqta 25,9 mln tonna dándi daqyl jınaldy, onyń ishinde 19,3 mln tonnasy – bıdaı. Maıly daqyldardan rekordtyq 4,9 mln tonna, burshaq daqyldarynan 1 mln tonna ónim alyndy. 2,8 mln tonna kartop jáne 3,7 mln tonna kókónis jınaldy. Shıtti maqtanyń jalpy túsimi 466 myń tonnaǵa jetip, sońǵy 18 jyldaǵy eń joǵary kórsetkishke qol jetkizildi.

- 2024–2025 marketıngtik jyly 15,3 mln tonna astyq eksporttaldy, bul aldyńǵy kezeńmen salystyrǵanda 60%-ǵa joǵary jáne sońǵy 20 jyldaǵy eń joǵary kórsetkish bolyp tabylady, - delingen habarlamada.

Sondaı-a onda egis alqaptaryn ártaraptandyrý sheńberinde bıdaı alqaby shamamen 900 myń gektarǵa qysqartylǵany aıtylǵan.

Bul rette burshaq daqyldarynyń alqaby 275 myń gektarǵa, maıly daqyldar alqaby 1 mln gektardan astamǵa ulǵaıtylǵan.

2025 jyly 1,8 mln tonna mıneraldy tyńaıtqysh engizildi, elıtalyq tuqymdardyń úlesi 11,6%-ǵa jetkizildi. Aýyl sharýashylyǵy tehnıkasynyń lızıngi kólemi alǵash ret 250 mlrd teńgege jetti: 25 myń tehnıka satyp alyndy, mashına-traktor parkiniń jańarý deńgeıi 6,5%-ǵa deıin ósti.

Alqa otyrysynda óńirlerdiń aýyl sharýashylyǵy jalpy óniminiń kólemin eki esege arttyrý jónindegi Jol kartasy ındıkatorlaryn oryndaýyna erekshe nazar aýdaryldy.

Ósý qarqyny boıynsha Batys Qazaqstan, Aqmola, Qostanaı, Soltústik Qazaqstan jáne Pavlodar oblystary kóshbasshy dep tanyldy. Artta qalǵan óńirlerge belgilengen kórsetkishterge ýaqtyly qol jetkizý, vedomstvoaralyq úılestirýdi kúsheıtý jáne salany damytýdyń strategııalyq baǵyttaryna resýrstardy shoǵyrlandyrý qajettigi kórsetildi.

Aýyl sharýashylyǵy mınıstri Aıdarbek Saparov Jol kartasy ár óńir boıynsha salanyń damý basymdyqtaryn aıqyndaıtyn negizgi qujat ekenin atap ótti.

- Jekelegen oblys ákimderiniń orynbasarlary tarapynan tapsyrmalardy oryndaýǵa formaldy kózqaras tanytýǵa jol berilmeıdi. Áreketsizdik tıisti sharalar qabyldana otyryp, laýazymdyq mindetterdi tıisinshe oryndamaý retinde qaralatyn bolady, — dedi Aıdarbek Saparov.

Sondaı-aq AÓK-ti damytý máseleleri jónindegi Qoǵamdyq keńestiń tóraǵasy, «Atameken» QR UKP Prezıdıýmy AÓK komıtetiniń tóraǵasy Erjan Nurbaev baıandama jasap, sóz sóıledi.

Alqa qorytyndysy boıynsha iri jer paıdalanýshylardy mal sharýashylyǵyn damyta otyryp, aralas sharýashylyq júrgizý modeline kóshirý arqyly jyl boıy jumyspen qamtýdy qamtamasyz etý jáne jer resýrstaryn paıdalaný tıimdiligin arttyrý, qaıta óńdelgen ónim úlesin ulǵaıtý jónindegi sharalardy iske asyrý, memlekettik qoldaý, jeńildetilgen kredıtteý jáne ınvestıtsııalyq sýbsıdııalaý quraldaryn barynsha paıdalaný, sondaı-aq veterınarııalyq jáne fıtosanıtarııalyq qaýipsizdikti nyǵaıtý baǵytyndaǵy júıeli jumysty jalǵastyrý tapsyryldy.

Aıta keteıik, otyrysta 2025 jylǵy agroónerkásiptik keshenniń damý qorytyndylary jáne 2026 jylǵa arnalǵan mindetteri talqylandy.

Otyrysqa Batyrjan Baıjumanov – Qazaqstan Respýblıkasy Prezıdenti Ákimshiliginiń memlekettik ınspektory, Prezıdent Ákimshiliginiń, Úkimet Apparatynyń, Atameken UKP ókilderi, birqatar mınıstrlikterdiń vıtse-mınıstrleri, ÚEU men bıznes ókilderi, oblys ákimderiniń orynbasarlary, sondaı-aq vedomstvonyń aýmaqtyq bólimsheleriniń basshylary qatysty.

Osyǵan deıin ǵalymdardyń aýyl sharýashylyǵyna arnalǵan jańa bıotyńaıtqysh tehnologııasyn usynǵan týraly jazǵan edik.