Astyq bazalarynan jóneltilgen ónim kólemi bir jylda 25 paıyzǵa ósti
ASTANA. KAZINFORM – 2025 jyly Azyq-túlik kelisimshart korporatsııasyna qarasty astyq bazalarynan astyq jóneltý kólemi ótken jylmen salystyrǵanda 25 paıyzǵa ósti.
2025 jyly Azyq-túlik kelisimshart korporatsııasynyń enshiles uıymy – «Astyq qoımalary» jaýapkershiligi shekteýli seriktestigi elevatorlardyń turaqty jumysyn qamtamasyz etip, astyqtyń, onyń ishinde memlekettik astyq qorynyń saqtalýyn tolyq kólemde júzege asyrdy.
Qańtar-jeltoqsan aılary aralyǵynda seriktestiktiń astyq qabyldaý pýnktterine 434 myń tonna astyq qabyldandy. Onyń 358 myń tonnasy – jańa ónim. 2026 jylǵy 19 qańtardaǵy jaǵdaı boıynsha «Astyq qoımalary» seriktestiginiń elevatorlarynda 264 myń tonna astyq saqtaýly.
Jyl qorytyndysy boıynsha tórt astyq bazasynan barlyǵy 432 myń tonna dándi jáne maıly daqyldar jóneltildi. Bul kórsetkish 2024 jyldyń sáıkes kezeńimen salystyrǵanda 25 paıyzǵa joǵary.
- Astyq qabyldaý úderisiniń ashyqtyǵyn qamtamasyz etý maqsatynda barlyq astyq qabyldaý beketterinde aýyl sharýashylyǵy ónimin ólsheýdi sýret arqyly tirkeıtin aqparattyq júıe engizildi. Bul adam faktorynyń yqpalyn barynsha azaıtýǵa múmkindik berdi.
Ótken jyldyń qorytyndysy boıynsha seriktestik astyq qabyldaý beketteriniń ınfraqurylymyn kútip-ustaý jáne jańǵyrtý jumystaryna 404 mıllıon teńge bóldi. Úsh astyq bazasy úshin astyq keptirgish qondyrǵylar men avtokólik satyp alyndy, qoıma ǵımarattary jóndeldi, sondaı-aq temirjol kirme joldaryndaǵy baǵyttamalar aýystyryldy, - delingen AShM habarlamasynda.
2026 jyly «Astyq qoımalary» óndiristik qýattardy jańǵyrtýdy jalǵastyryp, elevator jelisiniń múmkindikterin keńeıtýge baǵyttalǵan ınvestıtsııalyq jobalardy iske asyrýdy josparlap otyr.
Aıta keteıik, sharýalarǵa mobıldi astyq keptirgishterdi lızıngke alý múmkindigi usynyldy.